കോഴിക്കോട്: കോണ്‍ഗ്രസും ലീഗും ചേര്‍ന്നാല്‍ യു.ഡി.എഫ് ആകില്ലെന്ന് യൂത്ത് ലീഗ് ജന. സെക്രട്ടറി പി.കെ ഫിറോസ്.
കേരള കോണ്‍ഗ്രസിന്റെ മുന്നണി പ്രവേശനത്തേയും രാജ്യസഭാ സീറ്റ് നല്‍കിയ തീരുമാനത്തേയും ന്യായീകരിച്ച് ഫേസ്ബുക്കിലിട്ട പോസ്റ്റിലാണ് ഫിറോസ് കോണ്‍ഗ്രസ് നേതാക്കളെ പരോക്ഷമായി വിമര്‍ശിക്കുന്നത്. സീറ്റ് മാണിക്ക് നല്‍കിയതില്‍ കോണ്‍ഗ്രസിന്റെ യുവ നേതാക്കള്‍ പരസ്യമായി രംഗത്തുവന്ന സാഹചര്യത്തിലാണ് യൂത്ത് ലീഗ് നേതാവിന്റെ പ്രതികരണം.
പോസ്റ്റില്‍ കോണ്‍ഗ്രസിന്റെ മുന്‍ നിലപാടുകളെ ഫിറോസ് നിശിതമായി വിമര്‍ശിക്കുന്നുണ്ട്. ശത്രുവിനെ പോലെ പെരുമാറിയ കോണ്‍ഗ്രസിനോട് ഒരുപാട് വിട്ടുവീഴ്ചകള്‍ മുസ്‌ലിം ലീഗ് ചെയ്തതായി ഉദാഹരണങ്ങള്‍ സഹിതം ഫിറോസ് ചൂണ്ടിക്കാണിക്കുന്നു. ലീഗ് ചത്ത കുതിരയാണെന്ന് ജവഹര്‍ലാല്‍ നെഹ്‌റു പറഞ്ഞതും, 1960 ല്‍ മന്ത്രിസഭ രൂപീകരിച്ചപ്പോള്‍ ലീഗ് പറ്റില്ലെന്ന് കോണ്‍ഗ്രസ് പറഞ്ഞതും ഫിറോസ് പോസ്റ്റിലൂടെ ഓര്‍മപ്പെടുത്തുന്നുണ്ട്.
കോണ്‍ഗ്രസും ലീഗും മാത്രം ചേര്‍ന്നാല്‍ യു.ഡി.എഫ് ആവില്ല. സി.പി.എമ്മിന് ഈയിടെ പിടികൂടിയ മാണിപ്രേമം കോണ്‍ഗ്രസ് പ്രവര്‍ത്തകര്‍ മനസിലാക്കണം, ഈ രണ്ട് മുന്നണികളിലുമല്ലെങ്കില്‍ മാണി ബി.ജെ.പിയിലേക്ക് ചേക്കേറുമെന്നും ഫിറോസ് പറയുന്നു.