കൊച്ചി: ജോസ് കെ. മാണിയെ പരിഹസിച്ച് രാഷ്ട്രീയ നിരീക്ഷകനായ അഡ്വ. ജയശങ്കറിന്റെ ഫേസ്ബുക്ക് പോസ്റ്റ്. പിതാവ് കെ.എം മാണിയുടെ സാമര്‍ഥ്യവും പരോപകാര വ്യഗ്രതയും അതേ അളവില്‍, അല്ലെങ്കില്‍ ഒരല്‍പം കൂടിയ തോതില്‍ ജോസ് കെ. മാണിക്കും കിട്ടിയിട്ടുണ്ട്. കോട്ടയത്ത് ജോസ് കെ. മാണിയെ കാലുവാരി തോല്‍പ്പിക്കാമെന്ന് മനപ്പായസമുണ്ട കോണ്‍ഗ്രസുകാര്‍ ബ്ലീച്ചായിപ്പോയി. കേരള കോണ്‍ഗ്രസിലെ രാഹുല്‍ ഗാന്ധി എന്ന് ജോസ് കെ. മാണിയെ വിളിക്കുന്നത് വെറുതെയല്ലെന്നും ജയശങ്കര്‍ പറഞ്ഞു. ഗാഢമായ ആലോചനകള്‍ക്കൊടുവിലാണ് രാജ്യസഭാംഗമാകാന്‍ ഏറ്റവും യോഗ്യന്‍ ജോസൂട്ടിയാണെന്ന് കണ്ടെത്തിയത്. മൂന്നാം യു.പി.എ സര്‍ക്കാരില്‍ ക്യാബിനറ്റ് മന്ത്രിയോ അല്ലെങ്കില്‍ സ്വതന്ത്ര ചുമതലയുള്ള സഹമന്ത്രിയോയെങ്കിലും ആകാന്‍ സാധ്യതയുള്ളയാളാണ് ജോസ് കെ. മാണി എന്നും ജയശങ്കര്‍ പരിഹസിച്ചു.