കൊല്ലം: എ.ടി.എം തട്ടിപ്പിലൂടെ തങ്കശ്ശേരി സ്വദേശിക്ക് 80,000 രൂപ നഷ്ടമായെന്ന് പരാതി. തങ്കശ്ശേരി സ്വദേശി എ.ആര്‍ ഷിഹാബുദ്ദീനാണ് പണം നഷ്ടപ്പെട്ടെന്ന് കാണിച്ച് കഴിഞ്ഞ ദിവസം കൊല്ലം വെസ്റ്റ് പൊലിസില്‍ പരാതി നല്‍കിയത്. ഷിഹാബുദ്ദീന്റെ അക്കൗണ്ടിലൂടെ തമിഴ്‌നാട്ടിലെ വിവിധ എ.ടി.എമ്മുകളില്‍നിന്ന് പലതവണയായാണ് പണം പിന്‍വലിച്ചത്.
കഴിഞ്ഞമാസം 24ന് അര്‍ധരാത്രിയിലാണ് സംഭവം. എസ്.ബി.ഐ തങ്കശ്ശേരി ശാഖയിലെ ഷിഹാബുദ്ദീന്റെ അക്കൗണ്ടില്‍ മൂന്നുലക്ഷത്തിലധികം രൂപയുണ്ടായിരുന്നു. മേയ് 18ന് ഷിഹാബുദ്ദീന്‍ അക്കൗണ്ടില്‍നിന്ന് എ.ടി.എം വഴി പണം പിന്‍വലിച്ചിരുന്നു. പിന്നീട് മേയ് 26ന് അക്കൗണ്ടില്‍നിന്ന് 10,000 രൂപ പിന്‍വലിച്ചപ്പോഴാണ് പണം നഷ്ടപ്പെട്ട വിവരം അറിയുന്നത്. തുടര്‍ന്ന് മിനി സ്റ്റേറ്റ്‌മെന്റ് എടുത്തപ്പോഴാണ് 24ന് അര്‍ധരാത്രി പലതവണയായി 80,000 രൂപ തട്ടിയെടുത്ത വിവരം അറിയുന്നത്.
ബാങ്ക് അധികൃതരെ അറിയിച്ചെങ്കിലും ഏത് എ.ടി.എമ്മില്‍ നിന്നാണ് പണം പിന്‍വലിച്ചതെന്ന് കൃത്യമായി അറിയാന്‍ സാധിച്ചിട്ടില്ല. തുടര്‍ന്ന് കൊല്ലം വെസ്റ്റ് പൊലിസില്‍ പരാതി നല്‍കി. മേയ് 16നാണ് വടക്കേവിള സ്വദേശിയുടെ അക്കൗണ്ടില്‍നിന്ന് സമാനരീതിയില്‍ 70,900 രൂപ നഷ്ടപ്പെട്ടത്. ചെന്നൈയിലെ എ.ടി.എമ്മില്‍നിന്നായിരുന്നു ഇവിടെയും പണം പിന്‍വലിച്ചത്.