നടുവണ്ണൂര്‍: നടുവണ്ണൂര്‍ അങ്ങാടി മാലിന്യങ്ങള്‍ കൊണ്ട് ചീഞ്ഞുനാറുന്നു. ചാക്കുകളില്‍ കെട്ടിയ പ്ലാസ്റ്റിക് കവറുകളും മറ്റു മാലിന്യങ്ങളുമാണ് അങ്ങാടിയില്‍ പല സ്ഥലങ്ങളിലായി കൂട്ടിയിട്ടിരിക്കുന്നത്. നടുവണ്ണൂര്‍ ബസ്സ്റ്റാന്‍ഡിന്റെ മുന്നിലായി സംസ്ഥാന പാതയോടു ചേര്‍ന്നും വാകയാട് റോഡിലുമാണ് കൂടുതലായി മാലിന്യങ്ങള്‍ നിക്ഷേപിച്ചിട്ടുള്ളത്. രണ്ടാഴ്ച മുമ്പ് ടൗണ്‍ ശുചീകരണത്തിന്റെ ഭാഗമായി നീക്കം ചെയ്ത മാലിന്യങ്ങളാണ് ഇവിടങ്ങളില്‍ കൂട്ടിയിട്ടിരിക്കുന്നത്. മഴ പെയ്തതോടെ ഇവ ചീഞ്ഞുനാറാന്‍ തുടങ്ങിയിട്ടുണ്ട്. പകര്‍ച്ചവ്യാധി പകര്‍ന്നു പിടിക്കുന്ന സാഹചര്യത്തില്‍ ടൗണില്‍നിന്ന് മാലിന്യങ്ങള്‍ നീക്കം ചെയ്യണമെന്ന് നാട്ടുകാര്‍ ആവശ്യപ്പെട്ടു.