എടക്കര: ക്വാറന്റൈന്‍ കാലാവധി തീരാതെ ജോലിയില്‍ പ്രവേശിക്കാന്‍ ബ്രിട്ടീഷ് കമ്പനി നിര്‍ബന്ധിക്കുന്നതിനാല്‍ മലയാളികളടക്കമുളള എഴുപതോളം ഇന്ത്യക്കാര്‍ ദക്ഷിണാഫ്രിക്കയില്‍ ദുരിതത്തില്‍. 

ദക്ഷിണാഫ്രിക്കയിലെ കിന്റോസിലാണ് ഭക്ഷണവും വെള്ളവും കിട്ടാതെ ഇന്ത്യക്കാര്‍ ദുരിതത്തിലായിരിക്കുന്നത്. ഹൈഡ്രോ ആര്‍ക്ക് സെക്കുണ്ട എന്ന ബ്രിട്ടീഷ് ഓയില്‍ കമ്പനിയിലെ ജീവനക്കാരാണിവര്‍. കഴിഞ്ഞ മാസം ഇരുപത്തിയാറുമുതല്‍ ദക്ഷിണാഫ്രിക്കയില്‍ ലോക്ക്ഡൗണ്‍ പ്രഖ്യാപിച്ചിരുന്നു. തുടര്‍ന്ന് രണ്ട് ആഴ്ചത്തേക്ക് ലോക്ക് ഡൗണ്‍ നീട്ടുകയും ചെയ്തു.  ഇവര്‍ ജോലി ചെയ്തിരുന്ന കമ്പനിയുടെ വര്‍ക്ക് സൈറ്റില്‍ കൊവിഡ് സ്ഥിരീകരിച്ചതിനെത്തുടര്‍ന്നാണ് ജോലിക്കാര്‍ ക്വാറന്റൈനില്‍ ആയത്. എന്നാല്‍ കാലാവധി പൂര്‍ത്തിയാകും മുന്‍പ് ജോലിയില്‍ പ്രവേശിക്കാനാണ് കമ്പനിയുടെ നിര്‍ദ്ദേശം. ക്വാറന്റൈന്‍ കാലാവധി കഴിഞ്ഞ ശേഷം മാത്രമേ ജോലിക്കു കയറാന്‍ കഴിയുകയുള്ളുവെന്ന് ഇവര്‍ കമ്പനിയെ അറിയിച്ചു. എന്നാല്‍ ജോലിക്കാരുടെ വാദംകേള്‍ക്കാന്‍ കമ്പനി തയാറാകുന്നില്ല.

ഇതേത്തുടര്‍ന്ന് ഇവരോടൊപ്പമുണ്ടായിരുന്ന പ്രതിനിധികളെയും പാചക തൊഴിലാളികളെയും കമ്പനി മടക്കി വിളിച്ചു. അടുക്കള പൂട്ടുകയും വെള്ളം, ഗ്യാസ് എന്നിവയടക്കമുള്ള അവശ്യവസ്തുക്കളുടെ വിതരണം കമ്പനി നിര്‍ത്തുകയും ചെയ്തു. താമസസ്ഥലത്തുനിന്ന് ഇറക്കിവിടുമെന്ന് ഇന്നലെ കമ്പനി ഇവരെ ഭീഷണിപ്പെടുത്തുകയും ചെയ്തിട്ടുണ്ട്. മലപ്പുറം, പാലക്കാട്, എറണാകുളം, കൊല്ലം ജില്ലകളില്‍ നിന്നുള്ളവരാണ് മലയാളികളിലധികവും. മൂന്നു മാസത്തെ വിസക്കെത്തിയവര്‍ മുതല്‍ ഏഴ് വര്‍ഷമായി ജോലി ചെയ്യുന്ന ഇന്ത്യക്കാര്‍ വരെ ഇതില്‍ ഉള്‍പ്പെടും. ആലുവയിലുള്ള ഐ.എം.ആര്‍ എന്ന റിക്രൂട്ടിംഗ് ഏജന്‍സിയാണ് ഇവരെ ബ്രട്ടീഷ് കമ്പനിക്കു വേണ്ടി ദക്ഷിണാഫ്രിക്കയിലേക്ക് കൊണ്ടുപോയത്.