മയാമി: ആവേശം നിറഞ്ഞു നിന്ന പോരാട്ടത്തില്‍ റാഫേല്‍ നദാലിനെ നേരിട്ടുള്ള സെറ്റുകള്‍ക്ക് പരാജയപ്പെടുത്തി റോജര്‍ ഫെഡറര്‍ മയാമി ഓപണില്‍ കിരീടം ചൂടി. സ്‌കോര്‍ 6-3, 6-4. ഫെഡററുടെ കരിയറിലെ മൂന്നാമത് മയാമി ഓപണ്‍ കിരീടമാണിത്.
അതേസമയം മയാമിയില്‍ നദാല്‍ ഇത് അഞ്ചാം തവണയാണ് ഫൈനലില്‍ പരാജയപ്പെടുന്നത്. ഇതു വരെ ടൂര്‍ണമെന്റില്‍ കിരീടം നേടാനും താരത്തിന് സാധിച്ചിട്ടില്ല.
നേരത്തെ ആസ്‌ത്രേലിയന്‍ ഔാപണിലും ഇന്ത്യന്‍ വെല്‍സ് മാസ്റ്റേഴ്‌സിലും നദാലിനെ വീഴ്ത്തിയിരുന്നു ഫെഡറര്‍. സ്വിസ് താരത്തിന്റെ കരിയറില്‍ തുടര്‍ച്ചയായി നാലു തവണ നദാലിനെ പരാജയപ്പെടുത്തുന്നത് ഇതാദ്യമായിട്ടാണ്. നേര്‍ക്കു നേര്‍ പോരാട്ടങ്ങളില്‍ 23-14ന്റെ മുന്‍തൂക്കവും ഫെഡറര്‍ക്കുണ്ട്.
ഏകപക്ഷീയമായ മത്സരത്തില്‍ ഫെഡററോട് പിടിച്ചു നില്‍ക്കാന്‍ നദാല്‍ നന്നായി കഷ്ടപ്പെട്ടു. ഫെഡററുടെ മികച്ച റിട്ടേണുകള്‍ക്ക് മറുപടി നല്‍കാന്‍ നദാല്‍ ഇഞ്ചോടിഞ്ചാണ് പൊരുതിയത്.
ആദ്യ സെറ്റില്‍ 5-3ന് അതിവേഗ ം ലീഡെടുത്ത ഫെഡറര്‍ മത്സരം സ്വന്തമാക്കുകയും ചെയ്തു. രണ്ടാം സെറ്റില്‍ ഫെഡററോട് ഒപ്പത്തിനൊപ്പം നിന്ന് പൊരുതാന്‍ നദാലിന് സാധിച്ചു. 4-4ന് മത്സരം ഒപ്പമെത്തിച്ച നദാലിന് ഇവിടുന്നങ്ങോട്ട് മത്സരത്തിലെ നിയന്ത്രണം നഷ്ടമായി. ഇതോടെ 6-4ന് സെറ്റ് സ്വന്തമാക്കുകയായിരുന്നു ഫെഡറര്‍.
മയാമിയിലെ കിരീടം കരിയറിലെ 91ാമത് എ.ടി. പി കിരീടമാണ് ഫെഡറര്‍ക്ക്. 26ാമത് മാസ്റ്റേഴ്‌സ് കിരീടവുമാണിത്.