ഇടുക്കി: സംസ്ഥാനത്ത് കനത്ത മഴയിലും കാറ്റിലും നാശനഷ്ടം തുടരുന്നു. വയനാട്, ഇടുക്കി ജില്ലകളിലാണ് ഏറ്റവും കൂടുതല്‍ നാശനഷ്ടം. പലയിടങ്ങളിലും മണ്ണിടിച്ചിലുണ്ടായി. ഇടുക്കി ജില്ലയുടെ മിക്ക പ്രദേശങ്ങളിലും താറുമാറായ വൈദ്യുതി ബന്ധം ഇതുവരെ പുനഃസ്ഥാപിക്കാനായിട്ടില്ല. പലയിടങ്ങളിലും ഗതാഗതം താറുമാറായി. 

ശക്തമായ മഴയെത്തുടര്‍ന്ന് ഹൈറേഞ്ചില്‍ വന്‍ കൃഷിനാശവും റിപ്പോര്‍ട്ട് ചെയ്തിട്ടുണ്ട്.

ഇടുക്കി ഡാമുള്‍പ്പെടെ ജില്ലയിലെ മുഴുവന്‍ ഡാമുകളിലും, ജലസ്രോതസുകളിലും ജലനിരപ്പ് ക്രമാതീതമായി വര്‍ധിച്ചു.

തുടര്‍ച്ചയായി പെയ്യുന്ന മഴ കാരണം നെയ്യാര്‍ ഡാമില്‍ പരമാവധി ശേഷിയുടെ അടുത്തേക്കു വെള്ളത്തിന്റെ അളവ് എത്തി.

ഉരുള്‍പ്പൊട്ടലിന് സാധ്യതയുള്ള പ്രദേശങ്ങളില്‍ ഇപ്പോഴും ജാഗ്രത തുടരുകയാണ്. ഇടുക്കി ജില്ലയിലും പത്തനംതിട്ട റാന്നിയിലും മഴ ശക്തമായതിനെ തുടര്‍ന്ന് വിദ്യാഭ്യാസ സ്ഥാപനങ്ങള്‍ക്കും അവധി നല്‍കിയിരുന്നു.