പെരുമ്പിലാവ്: സഖാവ് എന്‍.എം സുബൈറിന്റെ ഓര്‍മകള്‍ക്ക് ഒരു വയസ്. സുബൈറിന്റെ വിയോഗത്തിന്റെ ഓര്‍മ പുതുക്കി കടവല്ലൂര്‍ സി.പി.എം പഞ്ചായത്ത് കമ്മിറ്റിയുടെ നേതൃത്വത്തില്‍ നിരവധി ജീവകാരുണ്യപ്രവര്‍ത്തനങ്ങളാണ് സംഘടിപ്പിച്ചിട്ടുള്ളത്. കഴിഞ്ഞ വര്‍ഷം ഏപ്രില്‍ നാല് കരിക്കാട് ദേശത്തിന് കറുത്ത ദിനമായിരുന്നു. കടവല്ലൂര്‍ പഞ്ചായത്തിലെ കമ്മ്യൂണിസ്റ്റ് പ്രസ്ഥാനത്തിന്റെ എല്ലാമെല്ലാമായിരുന്നു സഖാവ് എന്‍.എം സുബൈര്‍ തന്റെ ജീവിത പ്രയാസങ്ങള്‍ക്കിടയിലും മറ്റുള്ളവരുടെ വേദനകള്‍ക്ക് വേണ്ടി പ്രവര്‍ത്തിച്ചിരുന്നയാളാണ് സുബൈര്‍. കഴിഞ്ഞ വര്‍ഷം ഏപ്രില്‍ നാലിനാണ് വാഹനാപകടത്തില്‍ സുബൈറിനെ നാടിന് നഷ്ടപ്പെട്ടത്.
സുബൈറിന്റെ ഓര്‍മദിനത്തോടനുബന്ധിച്ച് കടവല്ലൂര്‍ സി.പി.എം പഞ്ചായത്ത് കമ്മിറ്റിയുടെ നേതൃത്വത്തില്‍ നിരവധി ജീവകാരുണ്യ പ്രവര്‍ത്തനങ്ങളാണ് നടത്തുന്നത്. അനുസ്മരണ സമ്മേളനത്തിന്റെ ഭാഗമായി സൗജന്യ ദന്ത പരിശോധനാക്യാംപ് നടത്തി. രാവിലെ പത്തു മണിക്ക് കരിക്കാട് അല്‍ അമീന്‍ സ്‌കൂളില്‍ ആരംഭിച്ച ക്യാംപ് മുന്‍ എം.എല്‍.എയും സി.പി.എം ഡി.സി അംഗവുമായ ബാബു.എം.പാലിശ്ശേരി ഉദ്ഘാടനം ചെയ്തു. ഡി.വൈ.എഫ്.ഐ യൂനിറ്റ് സെക്രട്ടറി ദില്‍ഷാദ് അധ്യക്ഷനായി. പി.എസ്.എം ദന്താശുപത്രിയുടെ സഹകരണത്തോടെയാണ് ക്യാമ്പ് സംഘടിപ്പിച്ചത്. പി.എസ്.എം കോളേജിലെ ഡോക്ടര്‍മാരായ ധന്യ,ജെസ്‌ന നേതൃത്വം നല്‍കി. കടവല്ലൂര്‍ പഞ്ചായത്ത് വൈസ് പ്രഡിഡന്റ് കെ.ഇ സുധീര്‍, വാര്‍ഡ് മെമ്പര്‍ ഷെബീര്‍, കൊച്ചനിയന്‍, ഇ.ആര്‍ രതീഷ്, പത്മം വേണുഗോപാല്‍  സംസാരിച്ചു. വൈകിട്ട് കരിക്കാട് നടന്ന സമ്മേളനത്തില്‍ ആദ്യകാല പ്രവര്‍ത്തകര്‍ക്ക് ആദരം, ബസ് സ്റ്റോപ്പ് ഉദ്ഘാടനം, ഭവന പുനരുദ്ധാരണ സഹായം, ചികിത്സ സഹായ വിതരണം, ട്രാഫിക്ക് ബോധവല്‍കരണ ക്ലാസ്, ലഹരി വിരുദ്ധ ക്യാംപയ്ന്‍ നടന്നു. മ്മേളനം സി.പി.എം ജില്ലാ സെക്രട്ടറി കെ. രാധാകൃഷ്ണന്‍ ഉദ്ഘാടനം ചെയ്തു. ശശി ഒലിയില്‍, എം.എ താഹിര്‍ നേതൃത്വം നല്‍കി.