ബഗ്ദാദ്: ഇറാഖ് തലസ്ഥാനമായ ബഗ്ദാദില്‍ കഴിഞ്ഞ ദിവസമുണ്ടായ ചാവേര്‍സ്‌ഫോടനത്തില്‍ കൊല്ലപ്പെട്ടവരുടെ എണ്ണം 213 ആയി. ഇറാഖ് ആഭ്യന്തരമന്ത്രാലയമാണ് ഇക്കാര്യം അറിയിച്ചത്. സംഭവത്തെ തുടര്‍ന്നു രാജ്യത്തു മൂന്നുദിവസത്തെ ദുഃഖാചരണം പ്രഖ്യാപിച്ചിട്ടുണ്ട്.
ഞായറാഴ്ചയുണ്ടായ സ്‌ഫോടനത്തില്‍ 225ലേറെ പേര്‍ക്കു പരുക്കേറ്റിട്ടുണ്ട്. ബഗ്ദാദിലെ കരാദ ജില്ലയില്‍ പെരുന്നാളിനോടനുബന്ധിച്ചു നടന്ന ഷോപ്പിങ്ങും തിരക്കും ലക്ഷ്യമിട്ടായിരുന്നു സ്‌ഫോടനം നടന്നത്.
സ്‌ഫോടകവസ്തുക്കള്‍ നിറച്ച ലോറി ജനമധ്യത്തില്‍ പൊട്ടിത്തെറിക്കുകയായിരുന്നു. 2007നു ശേഷം ഇറാഖിലുണ്ടായ ഏറ്റവും വലിയതും നാശനഷ്ടങ്ങളുണ്ടാക്കിയതുമായ സ്‌ഫോടനമാണിത്.
സ്‌ഫോടനത്തില്‍ ഒട്ടേറെ കുടുംബങ്ങളിലെ എല്ലാ അംഗങ്ങളും കൊല്ലപ്പെട്ടു. പലര്‍ക്കും മാരകമായി പൊള്ളലേറ്റു. സംഭവം നടന്നു മണിക്കൂറുകള്‍ക്കകം ഇവിടം സന്ദര്‍ശിച്ച ഇറാഖ് പ്രധാനമന്ത്രി ഹൈദര്‍അല്‍ അബാദി, രോഷാകുലനായാണ് അക്രമത്തോടു പ്രതികരിച്ചത്. അതേസമയം, ആക്രമണത്തിന്റെ ഉത്തരവാദിത്വം ഐ.എസ് ഏറ്റെടുത്തു.
ബഗ്ദാദില്‍ ഇരട്ട ചാവേര്‍ സ്‌ഫോടനമാണുണ്ടായത്. കൊല്ലപ്പെട്ടവരില്‍ ഇരുപതിലേറെ പേര്‍ കുട്ടികളാണ്.
മരിച്ചവരില്‍ നിരവധിപേരുടെ മൃതദേഹങ്ങള്‍ തിരിച്ചറിയാനാവാത്ത വിധത്തിലാണെന്ന് ഇറാഖ് ഹെല്‍ത്ത് ഡയറക്ടറേറ്റ് അറിയിച്ചു. മധ്യബഗ്ദാദിലെ കരാദ ജില്ലയിലെ ശിഈ വിഭാഗം തിങ്ങിപ്പാര്‍ക്കുന്ന പ്രദേശത്തായിരുന്നു ആക്രമണം.
ഫല്ലുജയുള്‍പ്പെടെയുള്ള ഐ.എസ് കേന്ദ്രങ്ങള്‍ ഇറാഖിസേന മോചിപ്പിച്ചു കൃത്യം ഒരാഴ്ചയ്ക്കു ശേഷമാണ് സ്‌ഫോടനമുണ്ടായതെന്നതു ശ്രദ്ധേയമാണ്.
അതേസമയം, ആക്രമണത്തില്‍ ഇരുനൂറിലേറെ പേര്‍ കൊല്ലപ്പെട്ടതായും സ്ഥിരീകരിക്കാത്ത റിപ്പോര്‍ട്ടുണ്ട്.