ദമ്മാം: സംഘര്‍ഷം നിലനില്‍ക്കുന്ന യമനില്‍നിന്നു സഊദിയുടെ അതിര്‍ത്തി ഗ്രാമത്തിലേക്കു തൊടുത്തുവിട്ട ബാലിസ്റ്റിക് മിസൈല്‍ തകര്‍ത്തതായി സഊദി അതിര്‍ത്തിസേന വ്യക്തമാക്കി.
തിങ്കളാഴ്ച പുലര്‍ച്ചെയാണ് അതിര്‍ത്തി ഗ്രാമമായ അബഹയെ ലക്ഷ്യമാക്കി യമനില്‍നിന്നു ബാലിസ്റ്റിക് മിസൈല്‍ തൊടുത്തത്.സഊദിയുടെ വായുസേനയുടെ നേതൃത്വത്തില്‍ ഇത് ആകാശത്തുവച്ചുതന്നെ തകര്‍ക്കുകയായിരുന്നുവെന്ന് സഊദി പ്രസ് ഏജന്‍സി റിപ്പോര്‍ട്ട് ചെയ്തു.
ആക്രമണത്തില്‍ ആര്‍ക്കും പരുക്കേറ്റിട്ടില്ല. എന്നാല്‍, യമനില്‍ എവിടെനിന്നാണ് മിസൈല്‍ തൊടുത്തുവിട്ടതെന്ന് അധികൃതര്‍ വ്യക്തമാക്കിയിട്ടില്ല. കുവൈത്തില്‍ പുരോഗമിക്കുന്ന യമന്‍ സമാധാന ചര്‍ച്ചയ്ക്കിടെ നടക്കുന്ന നാലാമത്തെ മിസൈല്‍ ആക്രമണമാണിത്.
ഇറാന്‍ അനുകൂല ഹൂത്തി ശീഈകളും യമന്‍ ഔദ്യോഗിക സര്‍ക്കാരും തമ്മില്‍ നടക്കുന്ന സംഘട്ടനത്തില്‍ സമാധാന ചര്‍ച്ചകള്‍ക്കായി കുവൈത്താണ് കാര്‍മികത്വം വഹിക്കുന്നത്.