കുറ്റ്യാടി: വിദ്യാര്‍ഥിനിയെ പീഡിപ്പിക്കാന്‍ ശ്രമിച്ച ഇതരസംസ്ഥാന തൊഴിലാളിയെ പോക് സോ നിയമപ്രകാരം അറസ്റ്റ് ചെയ്തു. ജാര്‍ഖണ്ഡ് ബങ്കികലഗണതൈ സ്വദേശി നസീറുദ്ദീനെ (25)യാണു തൊട്ടില്‍പ്പാലം പൊലിസ് അറസ്റ്റ് ചെയ്തത്. കഴിഞ്ഞദിവസം ഉച്ചയ്ക്കാണ് സംഭവം.
കള്ളാട് പ്രദേശത്തെ വിദ്യാര്‍ഥിനിയുടെ വീട്ടില്‍ മറ്റാരുമില്ലെന്ന് ഉറപ്പുവരുത്തി വെള്ളം ചോദിച്ചെത്തുകയും പീഡിപ്പിക്കാന്‍ ശ്രമിക്കുകയുമായിരുന്നു. ഇതിനിടെ ഓടിരക്ഷപ്പെട്ട പെണ്‍കുട്ടി അടുത്തവീട്ടില്‍ അഭയം പ്രാപിച്ച് വീട്ടുകാരെയും നാട്ടുകാരെയും അറിയിച്ചെങ്കിലും പ്രതി രക്ഷപ്പെട്ടിരുന്നു.
തുടര്‍ന്ന് നാട്ടുകാര്‍ ദേവര്‍കോവിലില്‍ വച്ച് ഇയാളെ പിടികൂടുകയും പൊലിസില്‍ ഏല്‍പ്പിക്കുകയുമായിരുന്നു. കോഴിക്കോട് പോക്‌സോ കോടതിയില്‍ ഹാജരാക്കിയ ഇയാളെ റിമാന്‍ഡ് ചെയ്തു.