കണ്ണൂര്‍: നേവല്‍ അക്കാദമി ക്വാട്ടേഴ്‌സില്‍ മരിച്ചനിലയില്‍ കണ്ടെത്തിയ മകന്റെ മൃതദേഹം പൊതുശ്മശാനത്തില്‍ സംസ്‌കരിക്കാനുള്ള നീക്കം അമ്മയുടെ കണ്ണീരിനു മുന്നില്‍ നേവല്‍ ഉദ്യോഗസ്ഥര്‍ക്ക് ഉപേക്ഷിക്കേണ്ടിവന്നു. പയ്യാമ്പലം പൊതുശ്മശാനത്തില്‍ ഇന്നലെ വൈകീട്ടാണ് നാടകീയ സംഭവം.
ചെന്നൈ സ്വദേശിയും ഏഴിമല നാവിക അക്കാദമയിലെ നാവികനുമായ രാജശേഖരനെ (26) ഞായറാഴ്ചയാണ് തൂങ്ങിമരിച്ച നിലയില്‍ കണ്ടെത്തിയത്. രാജശേഖരന്റെ മൃതദേഹം പയ്യാമ്പലം ശ്മശാനത്തില്‍ സംസ്‌കരിക്കാനായിരുന്നു നേവല്‍ ഉദ്യോഗസ്ഥരുടെ തീരുമാനം. മരണ വിവരം അറിഞ്ഞ് ചെന്നെയില്‍നിന്ന് അമ്മ ആര്യക്കവും സഹോദരങ്ങളായ അമ്മുവും ഇളയരാജയുമടക്കം എട്ടുപേരും ഏഴിമലയിലെത്തിയിരുന്നു. എന്നാല്‍ മൃതദേഹം പരിശോധനക്കായി കൊണ്ടുപോയതിനാല്‍ ചൊവ്വാഴ്ച രാവിലെയാണ് ഇവര്‍ക്ക് മൃതദേഹം കാണാന്‍ കഴിഞ്ഞത്. മൃതദേഹം സ്വദേശമായ ചെന്നൈയിലേക്ക് കൊണ്ടുപോകാന്‍ അനുവദിക്കണമെന്ന് അമ്മ ആവശ്യപ്പെട്ടെങ്കിലും ഭാര്യയുടെ സമ്മതപ്രകാരമാണ് നടപടിയെടുക്കേണ്ടതെന്ന് ഉദ്യോഗസ്ഥര്‍ മറുപടി നല്‍കുകയായിരുന്നു.
രാജശേഖരന്റെ ഭാര്യ ഉമ നേവല്‍ അക്കാദമിയിലാണ് താമസം. പൂര്‍ണ ഗര്‍ഭിണിയായ ഉമയെ അക്കാദമിയിലെ ആശുപത്രിയില്‍ പ്രവേശിപ്പിച്ചിരിക്കുകയാണ്. മൃതദേഹം പയ്യാമ്പലത്ത് മറവുചെയ്യുന്നതിനുള്ള സമ്മതപത്രം ഉമയില്‍ നിന്ന് നേവല്‍ ഉദ്യോഗസ്ഥര്‍ നേരത്തെ എഴുതിവാങ്ങിയിരുന്നു. എന്നാല്‍ ബന്ധുക്കള്‍ ഇതറിയാതെ രാജശേഖരന്റെ മൃതദേഹം വഹിച്ചുള്ള ആംബുലന്‍സിന് പിന്നാലെ പയ്യാമ്പലത്തെത്തുകയായിരുന്നു.
മൃതദേഹം സംസ്‌കരിക്കാന്‍ തുടങ്ങുന്നതറിഞ്ഞ് ഇവര്‍ ബഹളം വച്ചതോടെ രംഗം മാറി. പ്രദേശവാസികളും ഇവര്‍ക്കൊപ്പം ചേര്‍ന്നതോടെ ടൗണ്‍ പൊലിസ് സ്ഥലത്തെത്തി. നടപടിക്രമങ്ങള്‍ പൂര്‍ത്തിയാക്കിയാണ് മൃതദേഹം പയ്യാമ്പലത്ത് എത്തിച്ചതെന്നും അതിനാല്‍ വിട്ടുനല്‍കാനാവില്ലെന്നും നേവല്‍ ഉദ്യോഗസ്ഥര്‍ പറഞ്ഞു.
എന്നാല്‍ ബലംപ്രയോഗിച്ച് ബന്ധുക്കളെ മാറ്റി മൃതദേഹം മറവുചെയ്യുന്നത് പ്രശ്‌നത്തിനിടയാക്കുമെന്ന് പൊലിസ് നേവല്‍ ഉദ്യോഗസ്ഥരെ അറിയിച്ചു. ഏറെ നേരത്തെ ചര്‍ച്ചയ്‌ക്കൊടുവില്‍ ചെന്നൈയിലേക്ക് എത്തിക്കാന്‍ തീരുമാനിക്കുകയായിരുന്നു.
ഒടുവില്‍ പൊലിസ് നല്‍കിയ ഉറപ്പില്‍ ആര്യക്കവും ബന്ധുക്കളും അതേ ആംബുലന്‍സില്‍ നിറകണ്ണുകളോടെ മടങ്ങി.