തിരുവനന്തപുരം: നിപാ പ്രതിരോധ പ്രവര്‍ത്തനങ്ങളില്‍ ഏര്‍പ്പെട്ട എല്ലാ ഡോക്ടര്‍മാരും നഴ്‌സുമാരും ഉള്‍പ്പെടെയുള്ള ആരോഗ്യപ്രവര്‍ത്തകരെ സര്‍ക്കാര്‍ ആദരിക്കുമെന്ന് ആരോഗ്യമന്ത്രി കെ.കെ ശൈലജ. കക്ഷിരാഷ്ട്രീയ ഭേദമന്യേ നിപായെ നേരിടാന്‍ എല്ലാവരും ഒറ്റക്കെട്ടായി നിന്നതിന്റെ ഫലമായാണ് അതിജീവനം സാധ്യമായത്. ആരോഗ്യവകുപ്പ് പ്രവര്‍ത്തകരും നാട്ടുകാരും എല്ലാം ഒറ്റക്കെട്ടായാണ് നിപായെ നേരിട്ടത്. പരസ്പരം കുറ്റപ്പെടുത്താതെ സഹായം ചെയ്യാന്‍ ഭരണ- പ്രതിപക്ഷ വ്യത്യാസമില്ലാതെ എല്ലാവരും ഒപ്പമുണ്ടായിരുന്നുവെന്നും മന്ത്രി വാര്‍ത്താസമ്മേളനത്തില്‍ പറഞ്ഞു.
അത് ആരോഗ്യവകുപ്പിന് മികച്ച രീതിയില്‍ പ്രവര്‍ത്തിക്കാന്‍ കരുത്ത് നല്‍കി. പൊതുവായ പ്രശ്‌നങ്ങളില്‍ ഇത്തരമൊരു കൂട്ടായ ഇടപെടലാണ് ആവശ്യമെന്നും ആരോഗ്യമന്ത്രി പറഞ്ഞു.