മട്ടാഞ്ചേരി : ലക്ഷദ്വീപിലെ ചെറു ദ്വീപുകളിലേക്ക് കപ്പലിന് ടിക്കറ്റ് ലഭിക്കാതെ യാത്രക്കാര്‍ വലയുന്നു. ദ്വീപില്‍ നിന്ന് വിവിധ ആവശ്യങ്ങള്‍ക്കായി കേരളത്തിലെത്തിയ നിരവധി പേരാണ് ടിക്കറ്റില്ലാതെ കൊച്ചിയിലും കോഴിക്കോടു കുടുങ്ങിക്കിടക്കുന്നത്.
കപ്പലുകള്‍ മുടക്കമില്ലാതെ സര്‍വിസ് നടത്തുന്നുണ്ടെങ്കിലും ലക്ഷദ്വീപിലെ കില്‍ത്താന്‍, ചെത്ത്‌ലാത്ത്, ബിത്ര തുടങ്ങിയ ചെറു ദ്വീപുകളിലേക്ക് അധികൃതര്‍ ടിക്കറ്റ് നല്‍കുന്നില്ലെന്നാണ് പരാതി.
ലക്ഷദ്വീപിലെ പ്രധാന ദ്വീപുകളായ ആന്തോത്ത്, മിനിക്കോയ്, കവരത്തി, കല്‍പ്പേനി എന്നിവിടങ്ങളിലേക്കുള്ളവര്‍ക്കാണ് നിലവില്‍ ടിക്കറ്റ് നല്‍കുന്നത്.
ചെറുദ്വീപുകളിലുള്ളവര്‍ക്ക് ഇവിടെ ഇറങ്ങിയാലും ഇവരുടെ ദ്വീപുകളിലേക്ക് എത്തിപ്പെടണമെങ്കില്‍ കൊച്ചിയില്‍ നിന്നുള്ള കപ്പലുകള്‍ തന്നെ ആശ്രയിക്കണം.
റമദാന്‍ പെരുന്നാളിന് മുന്‍പ് ഇവര്‍ നാട്ടിലെത്താനാവാത്ത സ്ഥിതിയാണ് നിലവിലുള്ളത്.