മനാമ: പെരുന്നാള്‍ ദിനത്തില്‍ പ്രവാസികള്‍ക്ക് ആഹ്ലാദം പകര്‍ന്ന് ഗള്‍ഫ് എയറിന്റെ പുതിയ സര്‍വിസ് ആരംഭിച്ചു. ബഹ്‌റൈനില്‍ നിന്നും കോഴിക്കോട്ടേക്ക് നേരിട്ടുള്ള പ്രതിദിന സര്‍വിസിനാണ് പെരുന്നാള്‍ ദിനത്തില്‍ ഗള്‍ഫ് എയര്‍ ആരംഭിച്ചത്. ഇതോടെ കേരളത്തിലെ മൂന്നു വിമാനതാവളത്തിലേക്കും ഗള്‍ഫ് എയറിനു സര്‍വിസായി.

ബഹ്‌റൈനില്‍ നിന്നും എല്ലാ ദിവസവും രാത്രി 11.25ന് പുറപ്പെടുന്ന വിമാനം പുലര്‍ച്ചെ 4.30നാണ് കരിപ്പൂരിലെത്തുക. തിരിച്ചുള്ള വിമാനം പുലര്‍ച്ചെ 5.30ന് കരിപ്പൂരില്‍ നിന്നും പുറപ്പെട്ട് ബഹ്‌റൈന്‍ സമയം കാലത്ത് 7.20ന് ബഹ്‌റൈനിലെത്തും.

കൂടാതെ, സൗദിയില്‍ നിന്നും കോഴിക്കോട്ടേക്കുള്ള യാത്രക്കാര്‍ക്കും പുതിയ ഗള്‍ഫ് എയര് സര്‍വിസ് ഏറെ ആശ്വാസകരമാണ്. ഇവിടെ നിന്നും കണക്ഷന്‍ വിമാനം ഉള്ളതിനാല് സൗദിയിലെ ജിദ്ദ, മദീന, റിയാദ്, അബഹ, അല്‍ഖസീം തുടങ്ങിയ സ്ഥലങ്ങളില്‍നിന്നു കരിപ്പൂര്‍ യാത്രക്കാരായ പ്രവാസികള്‍ക്കും, കരിപ്പൂരില്‍ നിന്നു തിരിച്ചും ഈ സ്ഥലങ്ങളിലേക്കുള്ള യാത്രക്കാര്‍ക്കും ഗള്‍ഫ് എയറിന്റെ ബഹ്‌റൈന്‍ സര്‍വിസ് പ്രയോജനം ചെയ്യുമെന്നാണ് പ്രതീക്ഷിക്കുന്നത്.

ബഹ്‌റൈന് കരിപ്പൂര്‍ ഗള്‍ഫ് എയര്‍ വിമാനത്തിനു കണക്ഷന്‍ നല്‍കുന്ന വിധമാണ് പുതുതായി സൗദിയിലെ അബഹയിലേക്കും തബൂക്കിലേക്കും ജൂണ്‍ 15ന് ഗള്‍ഫ് എയര്‍് സര്‍വിസ് ആരംഭിച്ചത്.

ഗള്‍ഫ് എയര്‍ ജിദ്ദാ വിമാനം വൈകിട്ട് 5.30നു പുറപ്പെട്ടു 7.20നു ബഹ്‌റൈനിലെത്തും. 11.25നാണ് കോഴിക്കോട്ടേക്കുള്ള ഗള്‍ഫ് എയര്‍ സര്‍വിസ് . തിരിച്ചുള്ള വിമാനം ബഹ്‌റൈനില് നിന്നും രാവിലെ 10.15നു പുറപ്പെട്ട് ഉച്ചക്ക് 12.30നു ജിദ്ദയിലെത്തും. 

40 കിലോ ഫ്രീ ബാഗേജ് 10 കിലോ ഹാന്‍ഡ്ബാഗും അനുവദിക്കുന്നുണ്ട്. അവധിക്കാലത്ത് പുതിയ സര്‍വീസ് എത്തിയത് പ്രവാസികളുടെ യാത്ര സുഗമമാക്കുമെന്നാണ് പ്രതീക്ഷിക്കുന്നത്. നിലവില്‍ എയര്‍ഇന്ത്യ എക്‌സ്പ്രസ് മാത്രമാണ് ബഹ്‌റൈനില്‍ നിന്നും കോഴിക്കോട്ടേക്ക് നേരിട്ട് സര്‍വിസ് നടത്തുന്നത്.

കോഴിക്കോട് സര്‍വിസോടെ ഗള്‍ഫ് ഇന്ത്യയിലേക്കുള്ള സര്‍വിസ് എട്ടായി ഉയര്‍ന്നു. നിലവില്‍ തിരുവനന്തപുരത്തിനും കൊച്ചിക്കും പുറമേ, ഡല്‍ഹി, ചെന്നൈ, മുംബൈ, ഹൈദരാബാദ് എന്നിവടങ്ങളിലേക്കും ഗള്‍ഫ് എയര്‍ സര്‍വിസുണ്ട്.