കൊച്ചി: കണ്ണൂര്‍ പാലത്തായില്‍ നാലാം ക്ലാസ് വിദ്യാര്‍ഥിനിയെ അധ്യാപകനും ബി.ജെ.പി നേതാവുമായ പത്മരാജന്‍ പീഡിപ്പിച്ച കേസില്‍ ക്രൈംബ്രാഞ്ച് അന്വേഷണം ആരംഭിച്ചതായി ക്രൈംബ്രാഞ്ച് മേധാവി എ.ഡി.ജി.പി ടോമിന്‍ ജെ. തച്ചങ്കരി പറഞ്ഞു.  കേസ് ക്രൈംബ്രാഞ്ച് പഠിച്ചുവരികയാണ്. 

ഐ.ജി എസ്. ശ്രീജിത്തിന്റെ നേതൃത്വത്തിലാണ് അന്വേഷണം നടക്കുന്നത്. കേസ് അന്വേഷണത്തില്‍ പൊലിസിന് വീഴ്ച ഉണ്ടായെന്നത് അന്വേഷിക്കും. അക്കാര്യം തെളിഞ്ഞാല്‍ നടപടി സ്വീകരിക്കും. പ്രതിയെ ഒളിവില്‍ താമസിപ്പിച്ചവര്‍ക്കെതിരെയും നടപടി ഉണ്ടാവുമെന്ന് അദ്ദേഹം എറണാകുളത്ത് മാധ്യമ പ്രവര്‍ത്തകരോട് പറഞ്ഞു. 

കോവിഡ് -19 വ്യാപനവും ലോക്ക്ഡൗണും ക്രൈബ്രാഞ്ചിന്റെ പല കേസുകളെയും സാരമായി ബാധിച്ചിട്ടുണ്ട്. കോവിഡ് വന്നില്ലായിരുന്നെങ്കില്‍ പല കേസുകളിലും ഇപ്പോള്‍ അന്വേഷണം പൂര്‍ത്തിയാവുമായിരുന്നു. പല  പ്രമാദമായ കേസുകളുടെ അന്വേഷണ വേഗത്തെയും പുരോഗതിയെയും കോവിഡ് വ്യാപനം ബാധിച്ചു.

പ്രാഥമിക അന്വേഷണത്തില്‍ തെളിവുകള്‍ കണ്ടെത്തിയതിനാലാണ് മരട് ഫ്‌ളാറ്റ് കേസില്‍ മുന്‍ പഞ്ചായത്ത് പ്രസിഡന്റും സി.പി.എം നേതാവുമായ കെ..എ ദേവസ്യയെ പ്രതി ചേര്‍ക്കാന്‍ സര്‍ക്കാരിനോട് അനുമതി തേടിയത്. ആദ്യം അയച്ച അപേക്ഷയില്‍ മറുപടി ലഭിക്കാത്തതിനാല്‍ വീണ്ടും അനുമതി അപേക്ഷ നല്‍കി. 

എ.ജിയോട് നിയമോപദേശം തേടിയിട്ടുണ്ടെന്നാണ് അറിയുന്നത്. സര്‍ക്കാര്‍ അനുമതി പ്രകാരം മാത്രമേ ദേവസ്യക്കെതിരെ തുടര്‍ നടപടികള്‍ സ്വീകരിക്കാന്‍ കഴിയുകയുള്ളുവെന്നും അദ്ദേഹം പറഞ്ഞു.