കാട്ടാക്കട: മൂക്കുന്നിമലയുടെ താഴ്‌വാരമായ ഇടക്കോട് ഏലായില്‍ കക്കൂസ് മാലിന്യം തള്ളാനെത്തിയവരെ നാട്ടുകാര്‍ പിടികൂടി. ഇന്നലെ പുലര്‍ച്ചയോടെയാണ് ടാങ്കര്‍ ലോറിയില്‍ കക്കൂസ് മാലിന്യം തള്ളാനെത്തിയത്. പുഞ്ചക്കരി ബിനു (40), കരമന താളിയല്‍ സ്വദേശി മനു (24), നെയ്യാറ്റിന്‍കര പിരായുംമൂട് സ്വദേശി മഹേഷ് (28) എന്നിവരെയാണ് നാട്ടുകാര്‍ പിടികൂടിയത്. തുടര്‍ന്ന് ഇവരെയും വാഹനവും പൊലിസിന് കൈമാറി. ഇവര്‍ക്കെതിരേ കേസെടുത്ത് ജാമ്യത്തില്‍വിട്ടു.
നഗരത്തിലെ ഫ്‌ളാറ്റ്, ഹോട്ടല്‍ എന്നിവിടങ്ങളില്‍നിന്നുള്ള മാലിന്യങ്ങളാണ് ഇവിടെ തള്ളാനെത്തിച്ചതെന്നാണ് കരുതുന്നത്. പ്രദേശത്ത് കഴിഞ്ഞ കുറച്ച് ദിവസമായി കക്കൂസ് മാലിന്യം തള്ളുന്നത് പതിവാണ്. തുടര്‍ന്ന് നാട്ടുകാര്‍ രാത്രികാലങ്ങളില്‍ നിരീക്ഷണം ശക്തമാക്കിയിരുന്നു. ഇതിന്റെ ഫലമായാണ് ഇവര്‍ പിടിയിലായത്.