തിരുവനന്തപുരം: കാസര്‍കോട്ടും കണ്ണൂരും കൊവിഡ് രോഗബാധിതരുടെയും ക്വാറന്റൈനിലുള്ളവരുടെയും വിവരങ്ങള്‍ ചോര്‍ന്നത് ആശങ്കാജനകമെന്ന് മുല്ലപ്പള്ളി രാമചന്ദ്രന്‍.
വ്യക്തിഗത വിവരങ്ങള്‍ സര്‍ക്കാര്‍തലത്തില്‍ തന്നെ ചോരുന്നത് ഗൗരവമേറിയതാണ്. രോഗികളുടെയും സമ്പര്‍ക്ക പട്ടികയിലുള്ളവരുടെയും വിവരങ്ങള്‍ കൈകാര്യം ചെയ്യുന്നതിലെ ഗുരുതരമായ വീഴ്ചയാണ് ഇതിലൂടെ പുറത്തുവരുന്നത്. ആരോഗ്യവകുപ്പ് ശേഖരിച്ച വിവരങ്ങളുടെ അടിസ്ഥാനത്തില്‍ പൊലിസ് തയാറാക്കിയ സോഫ്റ്റ്‌വെയറില്‍ നിന്നാണ് വിവരങ്ങള്‍ പുറത്തുപോയത്. പൊലിസിന്റെ അതീവ രഹസ്യങ്ങള്‍ അടങ്ങുന്ന ഡാറ്റ ഊരാളുങ്കല്‍ ലേബര്‍ കോണ്‍ട്രാക്ട് സഹകരണ സൊസൈറ്റിക്ക് നല്‍കാന്‍ തീരുമാനിച്ച സര്‍ക്കാരില്‍ നിന്ന് ഇതിന് അപ്പുറവും പ്രതീക്ഷിക്കാമെന്നും മുല്ലപ്പള്ളി പറഞ്ഞു.