തിരുവനന്തപുരം: കൊവിഡ്-19 പ്രതിസന്ധിയുടെ പേരില്‍ സര്‍ക്കാര്‍ ജീവനക്കാരില്‍ നിന്ന് പിടിക്കുന്ന തുക മുഖ്യമന്ത്രിയുടെ ദുരിതാശ്വാസ നിധിയില്‍ എത്തുന്നില്ലെന്നതിനു തെളിവായി ട്രഷറി ഓഫിസുകള്‍ക്ക് ജോയിന്റ് ഡയരക്ടര്‍ നല്‍കിയ മാര്‍ഗനിര്‍ദേശം. ശമ്പളം നല്‍കുന്നതിനു മുമ്പ് പിടിക്കുന്ന തുക ടി.എസ്.ബി അക്കൗണ്ട് ആരംഭിച്ച് അതില്‍ നിക്ഷേപിക്കണമെന്നാണ് മാര്‍ഗനിര്‍ദേശത്തില്‍ പറയുന്നത്.

ഇതുപ്രകാരം ഈ തുക ദുരിതാശ്വാസത്തിന് എത്തുന്നതിനു പകരം അടുത്ത മാസം ശമ്പളം നല്‍കാനോ മറ്റു വികസനപ്രവര്‍ത്തനങ്ങള്‍ക്കോ ഉപയോഗിക്കാമെന്നാണ് ചട്ടം. പിടിച്ചുവയ്ക്കുന്ന തുക ദുരിതാശ്വാസ ഫണ്ടിലേക്ക് വകയിരുത്തിയാല്‍ നിശ്ചിത ഹെഡ്ഡുകളില്‍ മാത്രമേ ഉപയോഗിക്കാനാവൂ. എന്നാല്‍ നിലവില്‍ ശമ്പളത്തില്‍ നിന്ന് മാറ്റിവയ്ക്കുന്ന തുക സര്‍ക്കാരിന് കണ്‍സോളിഡേറ്റഡ് ഫണ്ടായി പരിഗണിച്ച് ഏതാവശ്യത്തിനും ഉപയോഗിക്കാം.
ശമ്പളം പിടിക്കുന്ന സര്‍ക്കാരിന്റെ നടപടി കള്ളക്കളിയാണെന്നും ഇതിനായാണ് ട്രഷറി സേവിങ്‌സ് അക്കൗണ്ടുകളുണ്ടാക്കാനും അതിലേക്കു നിക്ഷേപിക്കാനും നിര്‍ദേശിച്ചിരിക്കുന്നതെന്നും സര്‍ക്കാര്‍ ജീവനക്കാരുടെ സംഘടനകള്‍ ആരോപിക്കുന്നു.

ശമ്പളം പിടിക്കാനുള്ള ഉത്തരവില്‍ അതു തിരികെ നല്‍കുന്നതു സംബന്ധിച്ച പരാമര്‍ശമില്ല. മാത്രമല്ല, ഈ തുകയുടെ കൂടി ആദായനികുതി അടയ്ക്കുകയും വേണം. റവന്യൂ ചെലവിന്റെ പകുതി തുക കേന്ദ്ര സര്‍ക്കാരാണ് നല്‍കുന്നത്. അതു നഷ്ടപ്പെടാതിരിക്കാനാണ് ശമ്പളം നല്‍കിയതായി കാണിച്ച ശേഷം തിരിച്ചുപിടിക്കുന്നത്.
അതേസമയം, കോവിഡ് ദുരിതാശ്വാസത്തിനല്ല ജീവനക്കാരുടെ മൊത്തശമ്പളത്തില്‍ നിന്ന് ആറു ദിവസത്തെ വീതം ശമ്പളം അഞ്ചു മാസത്തേക്കു വിതരണം ചെയ്യാതിരിക്കുന്നതെന്ന് വ്യക്തമാക്കിയാണ് ഇതു സംബന്ധിച്ച ഉത്തരവ് സര്‍ക്കാര്‍ ഇറക്കിയത്. പകര്‍ച്ചവ്യാധിയെ തുടര്‍ന്ന് സംസ്ഥാനം കടുത്ത സാമ്പത്തിക പ്രതിസന്ധി നേരിടുന്ന സാഹചര്യത്തില്‍ ജനങ്ങളുടെ അടിസ്ഥാനാവശ്യങ്ങള്‍ നിറവേറ്റി സാധാരണ ജനജീവിതം ഉറപ്പുവരുത്തുകയാണ് ഇതുകൊണ്ട് ലക്ഷ്യംവയ്ക്കുന്നതെന്ന് ഉത്തരവില്‍ വിശദീകരിക്കുന്നുമുണ്ട്. ഇതേ വിവരം തന്നെ സര്‍ക്കാര്‍ ഹൈക്കോടതിയിലും ബോധിപ്പിച്ചിരുന്നു. ഇതു പരിഗണിച്ചതോടെയാണ് കേസില്‍ സര്‍ക്കാരിനു ഹൈക്കോടതിയില്‍ തിരിച്ചടി നേരിട്ടത്.