ലാഹോര്‍: പാകിസ്താന്റെ ഇതിഹാസ താരം മിസ്ബ ഉള്‍ ഹക്ക് അന്താരാഷ്ട്ര ക്രിക്കറ്റില്‍ നിന്ന് വിരമിക്കുന്നു. വെസ്റ്റിന്‍ഡീസിനെതിരായ മൂന്നു മത്സരങ്ങളുടെ ടെസ്റ്റ് പരമ്പര തന്റെ കരിയറിലെ അവസാനത്തേതാകുമെന്ന് മിസ്ബ അറിയിച്ചു. ഏപ്രില്‍ 21നാണ് പരമ്പര ആരംഭിക്കുന്നത്.
പരമ്പരയ്ക്ക് മുന്നോടിയായി ലാഹോറില്‍ വിളിച്ചു ചേര്‍ത്ത വാര്‍ത്താസമ്മേളനത്തിലാണ് മിസ്ബ വിരമിക്കല്‍ പ്രഖ്യാപിച്ചത്. കഴിഞ്ഞ കുറച്ചു കാലങ്ങളായി പാകിസ്താന്‍ ക്രിക്കറ്റ് ബോര്‍ഡ് ചെയര്‍മാനുമായി ഇക്കാര്യം സംസാരിക്കുന്നുണ്ട്. മികച്ച പ്രകടനത്തോടെ കളി അവസാനിപ്പിക്കണെന്നാണ് ആഗ്രഹമെന്നും മിസ്ബ വ്യക്തമാക്കി. നേരത്തെ 2015ലെ ലോകകപ്പിന് ശേഷം ഏകദിന ടി20 മത്സരങ്ങളില്‍ നിന്ന് മിസ്ബ വിരമിച്ചിരുന്നു. 72 ടെസ്റ്റില്‍ നിന്ന് 4951 റണ്‍സാണ് ഇതുവരെ മിസ്ബയുടെ സമ്പാദ്യം.ടെസ്റ്റില്‍ പാകിസ്താന്റെ എക്കാലത്തെയും മികച്ച റണ്‍വേട്ടക്കാരില്‍ ഏഴാം സ്ഥാനത്താണ് താരം.