രാജ്‌കോട്ട്: ഐ.പി.എല്ലില്‍ ഇന്ന് ഗുജറാത്ത് ലയണ്‍സ് കൊല്‍ക്കത്ത നൈറ്റ് റൈഡേഴ്‌സിനെ നേരിടും. രണ്ടു വട്ടം ചാംപ്യന്‍മാരായ കൊല്‍ക്കത്ത ടൂര്‍ണമെന്റിലെ വമ്പന്‍ ശക്തിയാണ്. മികച്ച ഓള്‍ റൗണ്ട് ടീം എന്ന പേരാണ് ടീമിനുള്ളത്. കഴിഞ്ഞ സീസണില്‍ ഗുജറാത്തിനോട് കളിച്ച രണ്ടു മത്സരങ്ങളിലും കൊല്‍ക്കത്ത തോറ്റിരുന്നു. അതുകൊണ്ടു തന്നെ കരുതിയാണ് ടീം കളത്തിലിറങ്ങുന്നത്. നായകന്‍ ഗൗതം ഗംഭീറില്‍ തന്നെയാണ് ടീമിന്റെ പ്രതീക്ഷ. ടീമിനെ മുന്നില്‍ നിന്ന് നയിക്കാന്‍ ഗംഭീറിന് സാധിക്കാറുണ്ട്.
അതോടൊപ്പം റോബിന്‍ ഉത്തപ്പ, സൂര്യകുമാര്‍ യാദവ്, മനീഷ് പാണ്ഡെ, ക്രിസ് ലിന്‍, ഷാകിബ് അല്‍ ഹസന്‍, യൂസഫ് പഠാന്‍, ക്രിസ് വോക്‌സ് എന്നീ കരുത്തുറ്റ ബാറ്റ്‌സ്മാന്‍മാരുടെ സാന്നിധ്യമുണ്ട്. അതോടൊപ്പം ട്രെന്‍ഡ് ബൂള്‍ട്ട്, കൂള്‍ട്ടര്‍ നൈല്‍,ഇഷാന്‍ ജഗ്ഗി, കോളിന്‍ ഗ്രാന്‍ഡം, തുടങ്ങിയ ബൗളര്‍മാരും കൂട്ടിനുണ്ട്.
ലയണ്‍സ് നിര ബാറ്റ്‌സ്മാന്‍മാരാല്‍ സമ്പന്നമാണ്. ആരോണ്‍ ഫിഞ്ച്, ഡ്വയ്ന്‍ ബ്രാവോ, ബ്രണ്ടന്‍ മക്കല്ലം, ജെയിംസ് ഫോക്‌നര്‍, സുരേഷ് റെയ്‌ന, ദിനേഷ് കാര്‍ത്തിക് എന്നീ തകര്‍പ്പന്‍ ബാറ്റ്‌സ്മാന്‍മാര്‍ ടീമിലുണ്ട്. ബൗളിങില്‍ പ്രവീണ്‍ കുമാര്‍, ഇഷാന്‍ കിഷന്‍, ഷദാബ് ജക്കാട്ടി, ആകാശ് ദീപ് സിങ്, മുനാഫ് പട്ടേല്‍ എന്നിവരുമുണ്ട്. രാജ്‌കോട്ടിലെ പിച്ചില്‍ ടോസ് നേടുന്ന ടീം ആദ്യം ബാറ്റ് ചെയ്യാനാണ് സാധ്യത. റണ്ണൊഴുകുന്ന പിച്ച് കൂടിയാണ് ഇത്. 180 റണ്‍സിലധികം നേടാനായാല്‍ പോരാട്ടം കനക്കും.