ദേശമംഗലം: പൊള്ളുന്ന വേനലില്‍ ഒരു തുള്ളി വെള്ളത്തിന് വേണ്ടി നാടൊന്നാകെ നെട്ടോട്ടമോടുമ്പോള്‍ ദേശമംഗലം തലശ്ശേരിയില്‍ 30 ഓളം കുടുംബങ്ങള്‍ക്ക് ജലസമൃദ്ധിയൊരുക്കുന്ന വീട്ടു കിണറിനെതിരെ സാമൂഹ്യ വിരുദ്ധരുടെ വിളയാട്ടം. ഓട്ടോ ഡ്രൈവര്‍ കുളപറമ്പില്‍ അബ്ദുള്‍ കരീമിന്റെ നിറയെ വെള്ളമുള്ള കിണറ്റില്‍ മണ്ണെണ്ണ ഒഴിച്ച നിലയില്‍ കണ്ടെത്തി. ഇന്നലെ ഉച്ചയോടെ കിണറ്റില്‍ നിന്ന് വെള്ളം കോരാനെത്തിയ അയല്‍ വാസികളാണ് വെള്ളത്തില്‍ നിന്ന് രൂക്ഷമായ മണ്ണെണ്ണ ഗന്ധം വരുന്നത് ആദ്യം അറിഞ്ഞത്. തുടര്‍ന്ന് നടത്തിയ പരിശോധനയിലാണ് മണ്ണെണ്ണ കലര്‍ന്നത് മനസിലായത്. ഇതോടെ 30 ഓളം കുടുംബങ്ങളുടെ കുടിവെള്ളവും മുട്ടി. ചെറുതുരുത്തി പൊലിസില്‍ നല്‍കിയ പരാതിയെ തുടര്‍ന്ന് പൊലിസ് കേസെടുത്ത് അന്വേഷണം ആരംഭിച്ചു.