കുട്ടനാട്: സംസ്ഥാനത്ത് മദ്യലഭ്യത ഉറപ്പാക്കുന്ന നയം ഉടന്‍ ഉണ്ടാകുമെന്ന് മന്ത്രി തോമസ് ചാണ്ടി. ഇന്നലെ കുട്ടനാട്ടിലെത്തിയ തോമസ് ചാണ്ടി മാധ്യമ പ്രവര്‍ത്തകരുമായി സംസാരിക്കുകയായിരുന്നു. വരുന്ന നിയമസഭാ സമ്മേളനത്തിന് മുന്‍പായി ഇക്കാര്യത്തില്‍ അന്തിമ തീരുമാനം ഉണ്ടാകും. കേരളത്തിലെ മദ്യശാലകളുടെ സൗകര്യം വര്‍ധിപ്പിക്കാന്‍ കോടതി നിര്‍ദേശിച്ചപ്പോള്‍ കേരളത്തിലെ കോണ്‍ഗ്രസിലെ പടലപ്പിണക്കങ്ങള്‍ മദ്യനിരോധനത്തിലേക്ക് കാര്യങ്ങള്‍ എത്തിച്ചു.
ഇപ്പോള്‍ മാറ്റി സ്ഥാപിക്കുന്ന മദ്യ വില്‍പനശാലകള്‍ക്ക് മുന്നില്‍ സ്ത്രീകള്‍ നടത്തുന്ന സമരത്തിന് പിന്നില്‍ ചില കോക്കസുകള്‍ പ്രവര്‍ത്തിക്കുന്നുണ്ട്. പാവം സ്ത്രീകള്‍ക്ക് ഇക്കാര്യത്തില്‍ എന്ത് തിരിച്ചറിവാണുള്ളതെന്നും തോമസ് ചാണ്ടി ചോദിച്ചു.
യു.ഡി.എഫ് മദ്യനയം ടൂറിസം മേഖലയ്ക്ക് വലിയ തിരിച്ചടിയാണ് ഉണ്ടാക്കിയത്. മദ്യനയത്തിലുള്ള കോടതിവിധി മണ്ടന്‍ തീരുമാനമാണ്. അന്തര്‍ദേശീയ മീറ്റിങ്ങുകള്‍ കേരളം വിട്ടുപോയി. ഇത് മദ്യനയംമൂലം സംഭവിച്ചതാണെന്നും തോമസ് ചാണ്ടി പറഞ്ഞു.