എടച്ചേരി: ഈദ് ദിനത്തില്‍ ആശുപത്രികളില്‍ രോഗികള്‍ക്കും, കൂട്ടിരിപ്പുകാര്‍ക്കും ഭക്ഷണം വിതരണം ചെയ്ത് വാട്‌സ്ആപ്പ് ഗ്രൂപ്പ് മാതൃകയായി. ഓര്‍ക്കാട്ടേരി മഹല്ല് കേന്ദ്രമാക്കി പ്രവര്‍ത്തിക്കുന്ന 'വോയ്‌സ് ഓഫ് ഓര്‍ക്കാട്ടേരി' എന്ന പ്രവാസി വാട്‌സആപ്പ് കൂട്ടായ്മ സംഘടിപ്പിച്ച ഈദിയ്യ 2016ന്റെ ഭാഗമായാണ് ഭക്ഷണ വിതരണം നടത്തിയത്. ഓര്‍ക്കാട്ടേരി സര്‍ക്കാര്‍ ആശുപത്രിയിലും വടകര സര്‍ക്കാര്‍ ആശുപത്രിയിലുമായിരുന്നു ഭക്ഷണ വിതരണം. ഈ വാട്‌സ്ആപ്പ് ഗ്രൂപ്പ് കഴിഞ്ഞ ഒരു വര്‍ഷക്കാലമായി ജീവകാരുണ്യ രംഗത്ത് നിരവധി സേവനങ്ങള്‍ ചെയ്തിട്ടുണ്ട്.
ഒരു വര്‍ഷത്തില്‍ അധികമായി പ്രവര്‍ത്തിക്കുന്ന വോയിസ് ഓഫ് ഓര്‍ക്കാട്ടേരി എല്ലാ മാസവും 46 നിര്‍ദ്ധനരായ കുടുംബങ്ങള്‍ക്ക് മരുന്നും ഭക്ഷണവും നല്‍കി വരുന്നുണ്ട്. ഓര്‍ക്കാട്ടേരി പാലിയേറ്റീവ് ക്ലിനിക്കിന് പ്രതിമാസം പതിനായിരം രൂപയുടെ മരുന്നും വടകര തണലിന് മാസംതോറും പതിനായിരം രൂപയും നല്‍കുന്നുണ്ട്.
ഭക്ഷണ വിതരണം ഓര്‍ക്കാട്ടേരി ഹെല്‍ത്ത് സെന്ററിലെ മെഡിക്കല്‍ ഓഫിസര്‍ ഡോ. രവീന്ദ്രന് നല്‍കി കോഴിക്കോട് ജില്ലാ പ്രവാസി ലീഗ് വൈസ് പ്രസിഡന്റ് കല്ലേരി മൂസ ഹാജി നിര്‍വഹിച്ചു. അബൂബക്കര്‍ മമ്പള്ളി , അമീറുദ്ധീന്‍ മുക്കാട്ട്, മഹമൂദ് കുളമുള്ളതില്‍ നേതൃത്വം നല്‍കി.