ഗസ്സ: അതിര്‍ത്തിയിലെ മതില്‍ പൊളിച്ചുവെന്ന് ആരോപിച്ച് ഇസ്‌റാഈല്‍ നടത്തിയ വെടിവയ്പില്‍ ഫലസ്തീന്‍ യുവാവ് കൊല്ലപ്പെട്ടു. വടക്കന്‍ ഗസ്സയിലായിരുന്നു സംഭവം. ഗസ്സ അതിര്‍ത്തിയില്‍ ഇസ്‌റാഈല്‍ നിര്‍മിച്ച മതില്‍ തകര്‍ത്തുവെന്ന് ആരോപിച്ചു നടത്തിയ ആക്രമണത്തില്‍ 24കാരനാണു കൊല്ലപ്പെട്ടത്. ഇതോടെ രണ്ടു മാസത്തോളമായി അതിര്‍ത്തിയില്‍ നടക്കുന്ന സംഘര്‍ഷത്തില്‍ കൊല്ലപ്പെട്ട ഫലസ്തീനികളുടെ എണ്ണം 125 ആയി. ഗസ്സ മുനമ്പില്‍ ഹമാസ് നിയന്ത്രണത്തിലുള്ള ഒന്‍പതോളം കേന്ദ്രങ്ങള്‍ക്കുനേരെ ഇസ്‌റാഈല്‍ ആക്രമണമുണ്ടായതായി റിപ്പോര്‍ട്ടുണ്ട്. പ്രകോപനപരമായി അതിര്‍ത്തികടന്ന് പട്ടങ്ങളും ബലൂണും പറത്തിയെന്ന് ആരോപിച്ച് ഇന്നലെ രാവിലെയായിരുന്നു ആക്രമണം.