മാഡ്രിഡ്: രണ്ട് ദിവസം മുന്‍പ് കോപ ഡെല്‍റേയില്‍ നടന്ന എല്‍ക്ലാസിക്കോയുടെ ചൂടാറും മുന്‍പ് ഇന്ന് വീണ്ടും റയലും ബാഴ്‌സയും തമ്മില്‍ കൊമ്പുകോര്‍ക്കും. ലാലിഗയിലാണ് റയലും ബാഴ്‌സയും തമ്മില്‍ മാറ്റുരക്കുന്നത്. റയലിന്റെ ഹോം ഗ്രൗണ്ടായ സാന്റിയാഗോ ബെര്‍ണബ്യൂവിലാണ് മത്സരം. രണ്ട് ദിവസം മുമ്പ് കോപ ഡെല്‍ റേയില്‍ നടന്ന എല്‍ക്ലാസിക്കോയില്‍ എതിരില്ലാത്ത മൂന്ന് ഗോളിന് ബാഴ്‌സ റയലിനെ തകര്‍ത്തിരുന്നു. റയല്‍ മികച്ച കളി പുറത്തെടുത്തിരുന്നെങ്കിലും ഗോള്‍ കണ്ടെത്താന്‍ കഴിഞ്ഞിരുന്നില്ല. ലാലിഗയില്‍ പോയിന്റ് പട്ടികയില്‍ ഒന്നാം സ്ഥാനത്ത് നില്‍ക്കുന്ന ബാഴ്‌സലോണ പോയിന്റ് വര്‍ധിപ്പിക്കാനുള്ള ശ്രമത്തിലാണ്. മൂന്നാം സ്ഥാനത്തുള്ള റയല്‍ മാഡ്രിഡിന് 48 പോയിന്റും ഒന്നാം സ്ഥാനത്തുള്ള ബാഴ്‌സക്ക് 57 പോയിന്റുമാണുള്ളത്. രണ്ടാം സ്ഥാനത്തുള്ള അത്‌ലറ്റികോ മാഡ്രിഡ് 50 പോയിന്റുമായി ബാഴ്‌സക്ക് ഭീഷണിയുമായി തൊട്ടുപിറകിലുണ്ട്. ഇരു ടീമുകള്‍ക്കും ഇന്ന് വിജയപ്രതീക്ഷയുണ്ടെങ്കിലും അവസാന ജയത്തിലെ ആത്മവിശ്വാസം ബാഴ്‌സക്ക് കരുത്ത് നല്‍കുന്നുണ്ട്. ലാലിഗയില്‍ നവംബറില്‍ നടന്ന മത്സരത്തില്‍ 5-1 എന്ന സ്‌കോറിന് ബാഴ്‌സലോണ വിജയം സ്വന്തമാക്കിയിരുന്നു.

ഇതിനും പകരം വീട്ടാനാണ് റയല്‍ സാന്റിയാഗോ ബെര്‍ണബ്യൂവിലെത്തുന്നത്. മികച്ച ഫോമിലുള്ള ലൂയീസ് സുവാരസ്, ലയണല്‍ മെസ്സി എന്നിവരെ പിടിച്ചു കെട്ടിയാല്‍ മാത്രമേ റയലിന് സ്വന്തം മൈതാനത്ത് ജയം കണ്ടെത്താനാകൂ. മികച്ച ഫോമില്‍ നില്‍ക്കുന്ന ബാഴ്‌സയുടെ ഗോള്‍ കീപ്പര്‍ ടെര്‍സ്റ്റീഗനെ കൂടി കീഴടക്കിയാല്‍ മാത്രമേ റയലിന് ഇന്ന് എന്തെങ്കിലും ചെയ്യാന്‍ സാധിക്കുകയുള്ളു. കോപ ഡെല്‍റേയിലെ മത്സരത്തില്‍ റയലിന്റെ വിനീഷ്യസ് ജൂനിയര്‍, മാര്‍ക്ക് അസെന്‍സിയോ എന്നിവര്‍ മികച്ച പ്രകടനം പുറത്തെടുത്തിരുന്നെങ്കിലും ഗോള്‍ കണ്ടെത്താനായിരുന്നില്ല.