തിരുവനന്തപുരം: മാതൃശിശു ആരോഗ്യം, കുടുംബാസൂത്രണം, രോഗപ്രതിരോധം എന്നീ മേഖലകളില്‍ 2012-17 കാലയളവില്‍ ദേശീയ ആരോഗ്യദൗത്യത്തിന് സംസ്ഥാന സര്‍ക്കാരിന്റെ ആനുപാതിക വിഹിതമായ 323.22 കോടി ലഭ്യമാക്കിയില്ലെന്ന് സി.എ.ജി റിപ്പോര്‍ട്ട്. 24.95 ലക്ഷം ഗര്‍ഭിണികളില്‍ 37 ശതമാനം പേരിലും ഇക്കാലയളവില്‍ എച്ച്.ഐ.വി പരിശോധന നടത്തിയില്ല. വയനാട്, മലപ്പുറം, തൃശൂര്‍, ആലപ്പുഴ ജില്ലകളില്‍ പരിശോധനക്ക് വിധേയമാക്കിയ 65 ആരോഗ്യ കേന്ദ്രങ്ങളില്‍ 15 എണ്ണത്തില്‍ മാത്രമാണ് പ്രസവസംബന്ധമായ സേവനത്തിനുള്ള സൗകര്യങ്ങള്‍ ഉണ്ടായിരുന്നത്. ഈ കാലയളവില്‍ പ്രസവ ശുശ്രൂഷക്ക് രജിസ്റ്റര്‍ ചെയ്ത 24.95 ലക്ഷം ഗര്‍ഭിണികളില്‍ 12 ശതമാനത്തിലധികം പേര്‍ക്ക് അയേണ്‍ ഫോളിക് ആസിഡ് ഗുളിക ലഭിച്ചിട്ടില്ലെന്നും സി.എ.ജി റിപ്പോര്‍ട്ട് പറയുന്നു.