ബാലുശ്ശേരി: രാത്രിയുടെ മറവില്‍ കക്കൂസ് മാലിന്യം വയലില്‍ തള്ളി. കോഴിക്കോട്-ബാലുശേരി റോഡില്‍ നന്മണ്ട 13 ചെറുവോട് ഇറക്കത്തിലെ തേനഞ്ചേരി ലക്ഷ്മിയുടെ വയലിലാണ് വാഹനത്തില്‍ കൊണ്ടുവന്ന മാലിന്യം തള്ളിയത്. മഴക്കാലമായതിനാല്‍ വയലുകളിലെല്ലാം വെള്ളം കെട്ടി നില്‍ക്കുകയാണ്. വയലോരത്തായി പത്തിലേറെ കുടുംബങ്ങള്‍ താമസിക്കുന്നുണ്ട്. ഇവരുടെ കുടിവെള്ള സ്രോതസായ കിണറുകളിലേയ്ക്ക് വയലില്‍ തളം കെട്ടി നില്‍ക്കുന്ന മലിനജലം ഊര്‍ന്നിറങ്ങുമോയെന്ന ആധിയും പ്രദേശവാസികള്‍ക്കുണ്ട്.
മാത്രമല്ല ഒട്ടേറെ കുടുംബങ്ങള്‍ക്ക് കുടിവെള്ളമെത്തിക്കുന്ന പറയരു കുന്നത്ത്- കല്ലുക്കണ്ടി ശുദ്ധജല വിതരണ പദ്ധതിയുടെ കിണറും ഈ വയലിനരികിലാണ്. ഈ കിണറും മലിനമാകുമൊയെന്ന ആശങ്കയും നാട്ടുകാര്‍ക്കുണ്ട്. കോഴിക്കോട്- ബാലുശേരി റൂട്ടില്‍ കക്കൂസ് മാലിന്യം തള്ളുന്നത് പതിവാണ്. വളഞ്ഞ 14, പന്ത്രണ്ടാം മൈല്‍, പതിനൊന്നെ നാല് എന്നിവിടങ്ങളില്‍ മുന്‍പ് മാലിന്യങ്ങള്‍ തള്ളിയിട്ടുണ്ട്.