കൊല്ലം: ഇന്നലെ കൊല്ലത്തുണ്ടായ കനത്ത മഴയിലും ശക്തമായ കാറ്റിലും വീടുകള്‍ക്ക് മുകളില്‍ മരം വീണ് ലക്ഷങ്ങളുടെ നാശനഷ്ടം. കൊല്ലം കന്റോണ്‍മെന്റ് സൗത്ത് കൊച്ചുമകാനി പള്ളിപ്പുരയിടത്തില്‍ സക്കീന, ബഷീര്‍, ദില്‍ഷാദ് എന്നിവരുടെ വീടുകള്‍ക്കാണ് കേടുപാടുകള്‍ സംഭവിച്ചത്. വീടിന്റെ മേല്‍ക്കൂരള്‍ തകരുകയും വീട്ടുപകരങ്ങള്‍ നശിക്കുകയും ചെയ്തു. വീട്ടിലെ വൈദ്യുതി ബന്ധവും മരം വീണ് വിഛേദിക്കപ്പെട്ടിരിക്കുകയാണ്. ഇന്നലെ രാത്രി എട്ടോടെയാണ് സംഭവം.
രാത്രി വൈകി സംഭവിച്ച ദുരന്തം കാരണം എന്തു ചെയ്യണമെന്നറിയാതെ കുഴങ്ങുകയാണ് വീട്ടുകാര്‍. വീടിന് സമീപത്തെ സോപാനം ഓഡിറ്റോറിയത്തിന്റെ പുരയിടത്തില്‍ നിന്ന മരമാണ് വീടുകള്‍ക്ക് മുകളിലേക്ക് കടപുഴകി വീണത്. വീടുകള്‍ക്ക് സമീപത്തെ എഫ്.സി.ഐ ഗോഡൗണിന്റെ മതിലും വീടിന് മുകളിലേക്ക് വീണും വീടിന് കേടുപാടുകള്‍ സംഭവിച്ചു.  നിര്‍ധനരായ ഇവരുടെ വീടുകള്‍ക്ക് സംഭവിച്ച കേടുപാടുകള്‍ പരിഹരിക്കാന്‍ ആരെ സമീപിക്കണമെന്നറിയാതെ കുഴങ്ങുകയാണിവര്‍.