തിരുവനന്തപുരം: മൂന്നാം ലോക്ക്ഡൗണാനന്തര ഇളവുകളില്‍ കൂടുതല്‍ വ്യക്തത വരുത്തി സംസ്ഥാന സര്‍ക്കാര്‍ മാര്‍ഗരേഖ. ഗ്രീന്‍ സോണുകള്‍ കേന്ദ്രീകരിച്ച് കൂടുതല്‍ ഇളവുകള്‍ക്ക് പ്രധാന്യം നല്‍കുന്നതാണ് സംസ്ഥാന സര്‍ക്കാരിന്റെ മാര്‍ഗ നിര്‍ദേശം. ചീഫ് സെക്രട്ടറിയാണ് പുതിയ നിര്‍ദേശങ്ങള്‍ പുറത്തിറക്കിയത്.

മാര്‍ഗരേഖയിലെ പ്രധാന നിര്‍ദേശങ്ങള്‍ ഇവ

• ഹോട്ട് സ്‌പോട്ടുകളില്‍ കര്‍ശന നിയന്ത്രണം തുടരും. പൊതു ഗതാഗതം ഒരു സോണിലും അനുവദിക്കില്ല. മദ്യ ശാലകള്‍, മാളുകള്‍ ബാര്‍ബര്‍ ഷോപ്പുകള്‍ എന്നിവ ഒരു സോണിലും തുറക്കില്ല
• സ്വകാര്യ വാഹനങ്ങളില്‍ ഡ്രൈവര്‍ക്ക് പുറമെ രണ്ട് പേര്‍ മാത്രമെ ഉണ്ടാകാവൂ.
• വിദ്യാഭ്യാസ സ്ഥാപനങ്ങള്‍ തുറക്കാന്‍ അനുവദിക്കില്ല.
• ഗ്രീന്‍ സോണിലുള്ള സേനവമേഖലയിലെ സ്ഥാപനങ്ങള്‍ ആഴ്ചയില്‍ മൂന്ന് ദിവസം മാത്രമേ പ്രവര്‍ത്തിക്കാവൂ. 50 ശതമാനം ജീവനക്കാരെ വച്ച് മാത്രം
• ഓറഞ്ച്, ഗ്രീന്‍ സോണുകളില്‍ രാവിലെ ഏഴുമുതല്‍ രാത്രി ഏഴരവരെ കടകള്‍ പ്രവര്‍ത്തിക്കും. അതേസമയം മൂന്ന് സോണുകളിലും ഞായറാഴ്ച സമ്പൂര്‍ണ്ണ ലോക്ക്ഡൗണ്‍ ആയിരിക്കും.
• ജില്ലാകലക്ടര്‍മാര്‍ക്ക് പ്രാദേശിക സാഹചര്യങ്ങള്‍ കണക്കിലെടുത്ത് തീരുമാനമെടുക്കാം

പ്രവാസികളുടെ തിരിച്ചുവരവ്

• പ്രവാസികള്‍ വരുമ്പോള്‍ വിമാനത്താവളങ്ങളില്‍ കര്‍ശന പരിശോധന ഉണ്ടാകും. രോഗ ലക്ഷണം ഇല്ലെങ്കില്‍ വീട്ടില്‍ പോകാം
• വീട്ടില്‍ ക്വറന്റീന്‍ നിര്‍ബന്ധം. രോഗം പിടിപെടാന്‍ സാധ്യത ഉള്ളവര്‍ വീട്ടില്‍ ഉണ്ടെങ്കില്‍ സര്‍ക്കാരിന്റെ പ്രത്യേക കേന്ദ്രങ്ങളിലേക്ക് മാറണം.
• സ്വന്തം ചെലവില്‍ ഹോട്ടലുകളില്‍ താമസിക്കാം. അവിടെയും ക്വറന്റീന്‍ നിര്‍ബന്ധം.
• വിദേശത്ത് നിന്ന് എത്തുന്നവര്‍ നിരീക്ഷണത്തിലാണെന്ന് പൊലിസ് ഉറപ്പാക്കണം