ടെക്‌സാസ്: യു.എസില്‍ കറുത്ത വര്‍ഗക്കാരനെ പൊലിസ് വെടിവെച്ചു കൊന്നതില്‍ പ്രതിഷേധിച്ച് ഡല്ലാസില്‍ നടത്തിയ പ്രതിഷേധ മാര്‍ച്ചിനിടെ വെടിവെപ്പ്. അഞ്ച്  പൊലിസുകാര്‍ കൊല്ലപ്പെട്ടു. ആറ് പേര്‍ക്ക് പരുക്കേറ്റു. പരുക്കേറ്റ മൂന്ന് പേരുടെ നില ഗുരുതരമാണ്.

കഴിഞ്ഞ ദിവസം മിനിസോട്ടയിലും ലൂസിയാനയിലും ഉണ്ടായ പൊലിസ് വെടിവെപ്പില്‍ കറുത്ത വര്‍ഗക്കാരനായ യുവാവ് മരിച്ചിരുന്നു. വ്യാഴായ്ച്ച പ്രാദേശിക സമയം രാത്രി 8.45 ന് മാര്‍ച്ചിനിടെ ഒളിപ്പോരാളികളായ രണ്ടു പേര്‍ പൊലിസിനു നേരെ വെടിയുതിര്‍ക്കുകയായിരുന്നു. ഇവരെ തിരിച്ചറിയാന്‍ സാധിച്ചിട്ടില്ല.

പൊലീസുകാര്‍ക്കുനേരെ രണ്ടു പേര്‍ വെടിയുതിര്‍ക്കുന്നതും സുരക്ഷ ഉദ്യോഗസ്ഥര്‍ പ്രത്യാക്രമണം നടത്തുന്നതിന്റെയും ദൃശ്യങ്ങള്‍ പുറത്തുവന്നിട്ടുണ്ട്. ഇവിടെ തിരച്ചില്‍ നടത്തിയിരുന്നെങ്കിലും അക്രമികള്‍ രക്ഷപ്പെടുകയായിരുന്നു.

ആയിരക്കണക്കിന് ആളുകളാണ് മാര്‍ച്ചില്‍ പങ്കെടുത്തത്. പൊലിസ് വെടിവെപ്പില്‍ യുവാവ് കൊല്ലപ്പെടുന്ന ദൃശ്യം കാസ്റ്റിലിന്റെ കാമുകി മൊബൈലില്‍ ചിത്രീകരിക്കുകയും ഫെയ്‌സ്ബുക്കില്‍ പോസ്റ്റ് ചെയ്യുകയും ചെയ്തിരുന്നു.