മുംബൈ: ഐ.പി.എല്ലിലും ഫോര്‍മുല വണ്ണിലും വരെ മല്യ പണം ചെലവഴിച്ചുവെന്ന് പുതിയ കണ്ടെത്തല്‍. വിജയ് മല്യക്കെതിരേയുള്ള സാമ്പത്തിക തട്ടിപ്പ് കേസിലാണ് കൂടുതല്‍ വെളിപ്പെടുത്തലുകളുണ്ടായത്. 3700 കോടിയുടെ വായ്പ വിവിധയിടങ്ങളിലേക്ക് മാറ്റി ചെലവഴിച്ചു എന്നാണ് എന്‍ഫോഴ്‌സ്‌മെന്റ് പറയുന്നത്. കേസ് നല്‍കിയ ബാങ്കുകളുടെ കോടതി ചെലവുകള്‍ വഹിക്കണമെന്ന് ബ്രിട്ടീഷ് കോടതി നേരത്തെ മല്യയോട് ആവശ്യപ്പെട്ടിരുന്നു. ഇതിന് പിന്നാലെയാണ് പുതിയ കേസ് വന്നിരിക്കുന്നത്. ബ്രിട്ടനില്‍ നിന്ന് മല്യയെ തിരിച്ച് ഇന്ത്യയിലെത്തിക്കുന്നതിനുള്ള വഴികളാണ് ഇപ്പോള്‍ എന്‍ഫോഴ്‌സ്‌മെന്റ് ആലോചിക്കുന്നത്. 

കേസ് രാഷ്ട്രീയപ്രേരിതമാണെന്നും തനിക്ക് ഇതില്‍ യാതൊരു പങ്കുമില്ലെന്നുമാണ് അദ്ദേഹം ആരോപിക്കുന്നത്. വിവിധ ബാങ്കുകളില്‍ നിന്നും 3700 കോടിയാണ് മല്യ എടുത്തത്. മല്യ ഈ പണം ഐ.പി.എല്‍ ടീമിലേക്കും ബ്രിട്ടനിലെ ഫോര്‍മുല വണ്‍ മോട്ടോ സ്‌പോട്ടിലേക്കും വകമാറ്റി ചെലവഴിച്ചെന്നാണ് ആരോപണം. പ്രൈവറ്റ് ജെറ്റുകളും ഈ പണം കൊണ്ട് വാങ്ങിയെന്ന് ആരോപണമുണ്ട്. ഐ.പി.എല്ലിലെ പ്രമുഖ ടീമായ ബാംഗ്ലൂര്‍ റോയല്‍ ചലഞ്ചേഴ്‌സിന്റെ ഉടമയായിരുന്നു മല്യ. പിന്നീടിത് മറ്റാരോ ഏറ്റെടുത്തെന്ന് റിപ്പോര്‍ട്ടുകളുണ്ടായിരുന്നു.