കൊല്ലം: കൊല്ലം-താംബരം എക്‌സ്പ്രസ് ട്രെയിന്‍ ചെന്നൈ എഗ്മൂറിലേക്ക് നീട്ടാനുള്ള നടപടികള്‍ പൂര്‍ത്തിയായതായി കൊടിക്കുന്നില്‍ സുരേഷ് എം.പി വാര്‍ത്താസമ്മേളനത്തില്‍ അറിയിച്ചു. സതേണ്‍ റെയില്‍വേ ജനറല്‍ മാനേജരും ചീഫ് ഓപ്പറേറ്റിങ് മാനേജര്‍, കൊമേഴ്‌സ്യല്‍ മാനേജര്‍ എന്നിവരുമായി നിരന്തരം നടത്തിയ ചര്‍ച്ചയുടെ ഫലമായിട്ടാണ് ഇത് സാധ്യമാക്കിയതെന്നും അദ്ദേഹം പറഞ്ഞു. താംബരത്തുനിന്നു എഗ്മോറിലേക്ക് ഏതാണ്ട് 30 കി.മി ദൂരമുണ്ട്. ചെന്നൈ നഗരത്തിലെ കടുത്ത ഗതാഗതക്കുരുക്കില്‍ താംബരത്തുനിന്നു ചെന്നൈ പട്ടണത്തിലേക്കും മറ്റു ഭാഗങ്ങളിലേക്കും യാത്രക്കാര്‍ക്ക് എത്തിച്ചേരാന്‍ ബുദ്ധിമുട്ടാണ്. ട്രെയിന്‍ നീട്ടുന്നത് യാത്രക്കാര്‍ക്ക് സഹായകരമാകുമെന്നും കൊടിക്കുന്നില്‍ വ്യക്തമാക്കി.