പേരൂര്‍ക്കട: കലക്ടറേറ്റില്‍ സുരക്ഷാ ക്രമീകരണങ്ങളൊരുക്കുന്നതിന്റെ ഭാഗമായി സി.സി.ടി.വി ക്യാമറകള്‍ സ്ഥാപിക്കുമെന്ന് ജില്ലാ കലക്ടര്‍ ബിജു പ്രഭാകര്‍ പറഞ്ഞു. കലക്ടറേറ്റിലേക്കു വരുന്ന വാഹനങ്ങള്‍ പരിശോധനയ്ക്കു വിധേയമാക്കാന്‍ നടപടിയെടുക്കും. കലക്ടറേറ്റിലെ ഉപയോഗശൂന്യമായ വാഹനങ്ങള്‍ നീക്കംചെയ്യാനും നടപടിയുണ്ടാകും.
ജീവനക്കാരുടെ സഹകരണത്തോടെ മാലിന്യനീക്ക യജ്ഞം സംഘടിപ്പിക്കും. സിവില്‍ സ്റ്റേഷനു ചുറ്റുമുള്ള നടപ്പാതകള്‍ അറ്റകുറ്റപ്പണി നടത്താനും കാടുവെട്ടിത്തെളിക്കാനും പൊതുമരാമത്ത് കെട്ടിട വിഭാഗത്തെ ചുമതലപ്പെടുത്തും. വിവിധ ആവശ്യങ്ങള്‍ക്കായി വരുന്നവരുടെ സൗകര്യാര്‍ഥം താഴത്തെ നിലയില്‍ ഒരു ഹെല്‍പ് ഡെസ്‌ക് പ്രവര്‍ത്തനസജ്ജമാക്കുമെന്നും കലക്ടര്‍ വ്യക്തമാക്കി.