പെരുമ്പാവൂര്‍: വാഹനങ്ങള്‍ തമ്മില്‍ കൂട്ടിയിടിച്ചുണ്ടായ തര്‍ക്കത്തെ തുടര്‍ന്ന് യുവാവിന് കുത്തേറ്റു. എടത്തല കുഴിവേലിപ്പടി വലിയ വീട്ടില്‍ അന്‍സലിനാണ് (24) കുത്തേറ്റത്.
ഇയാളും സുഹൃത്തും സഞ്ചരിച്ച ബൈക്കും പാണംകുഴിയിലുള്ള രണ്ട് പേര്‍ സഞ്ചരിച്ച ബൈക്കും കൂട്ടിയിടിച്ചുണ്ടായ അപകടമാണ് പ്രശ്‌നത്തിന് കാരണം. ശനിയാഴ്ച രാത്രി 12.15ന് എം.സി റോഡിലെ ഷാലിമാര്‍ ഹോട്ടലിന് സമീപത്താണ് സംഭവമുണ്ടായത്.
അപകടത്തില്‍ അന്‍സലിന്റെ ബൈക്കിന് കേട്പാട് സംഭവച്ചതിനെ തുടര്‍ന്ന് ഇയാള്‍ നഷ്ടം പരിഹാരം ചോദിച്ചു. ഈ സമയം പാണംകുഴി സ്വദേശികള്‍ അവരുടെ സുഹൃത്തുക്കളായ നാല് പേരെ വിളിച്ച് വരുത്തുകയായിരുന്നു. സ്ഥലത്തെത്തിയ ഇവരും അന്‍സലുമായി വാക്ക് തര്‍ക്കമുണ്ടായി.
ഈ സമയം ഒരാള്‍ അന്‍സലിന്റെ പുറത്ത് കുത്തുകയാണുണ്ടായത്. സംഭവത്തില്‍ ആറുപേര്‍ക്കെതിരെ പൊലിസ് കേസെടുത്തു. മൂന്ന് പ്രതികളെ ഞായറാഴ്ച വൈകിട്ട് പൊലിസ് കസ്റ്റഡിയിലെടുത്തെങ്കിലും കേസ് രജിസ്റ്റര്‍ ചെയ്തിട്ടില്ല. മറ്റുള്ളവരെ തെരയുന്നുണ്ട്. പിടിയിലായവര്‍ മറ്റ് പല കേസുകളിലും പ്രതികളാണെന്ന് പൊലിസ് പറഞ്ഞു. അന്‍സില്‍ ആലുവ രാജഗിരി ആശുപത്രിയില്‍ ചികില്‍സയിലാണ്.