ബഗ്ദാദ്: പരീക്ഷാ കോപ്പിയടി തടയാന്‍ അത്യപൂര്‍വ്വ നടപടിയുമായി ഇറാഖും അള്‍ജീരിയയും. പരീക്ഷ നടക്കുന്ന ദിവസങ്ങളില്‍ ഇന്റര്‍നെറ്റ് ഓഫ് ചെയ്യാന്‍ തീരുമാനിച്ചിരിക്കുകയാണ് ഇരുരാജ്യങ്ങളും.

പരീക്ഷ നടക്കുന്ന അഞ്ചു ദിവസങ്ങളില്‍ ഫെയ്‌സ്ബുക്ക് പൂര്‍ണമായും നിരോധിക്കും. 2016 ല്‍ പരീക്ഷ നടക്കുന്നതിനു മുന്‍പ് ചോദ്യപേപ്പര്‍ ചോര്‍ന്നതിനെത്തുടര്‍ന്നാണ് കടുംകൈയ്ക്ക് പ്രേരിപ്പിച്ചത്.

ഈമാസം 25 വരെ എല്ലാ ദിവസവും രാവിലെ രണ്ടര മണിക്കൂര്‍ ഇന്റര്‍നെറ്റ് ഓഫ് ചെയ്യുമെന്ന് അള്‍ജീരിയ ടെലികോം അറിയിച്ചു. മൊബൈല്‍, ലാന്റ്‌ലൈന്‍ തുടങ്ങി എല്ലാ സ്രോതസ്സില്‍ നിന്നുള്ള ഇന്റര്‍നെറ്റും ഓഫ് ചെയ്തുവയ്ക്കും.

ഹൈസ്‌കൂള്‍ പരീക്ഷ നടക്കുന്നതിനിടെയാണ് 2016 ല്‍ ചോദ്യപേപ്പര്‍ ചോര്‍ന്നത്. ഇതേത്തുടര്‍ന്ന് 2017 ല്‍ സോഷ്യല്‍മീഡിയ നിയന്ത്രിക്കാന്‍ സേവനദാതാക്കള്‍ക്ക് നിര്‍ദേശം നല്‍കി. എന്നാല്‍ അതു ഫലം കാണാത്തതിനെത്തുടര്‍ന്നാണ് പുതിയ നടപടി.

ഇറാഖില്‍ അടുത്ത രണ്ടാഴ്ച സമാനമായി ഇന്റര്‍നെറ്റ് ഓഫ് ചെയ്യും.

കഴിഞ്ഞവര്‍ഷങ്ങളില്‍ ഇറാഖ്, സിറിയ, എത്യോപ്യ തുടങ്ങിയ രാജ്യങ്ങളില്‍ പരീക്ഷാസമയത്ത് ഇന്റര്‍നെറ്റ് നിയന്ത്രിച്ചിരുന്നു. ബിഹാര്‍, ഉത്തര്‍പ്രദേശ് തുടങ്ങി ഇന്ത്യന്‍ സംസ്ഥാനങ്ങളിലും ഇന്റര്‍നെറ്റിന് നിയന്ത്രണം ഏര്‍പ്പെടുത്തിയിരുന്നു.