കണ്ണൂർ: നിത്യോപയോഗ സാധനങ്ങളുടെ വില കുതിക്കുമ്പോൾ അടുക്കളയിൽ കൈപൊള്ളി ജനം. പൊതുവിപണിയിൽ സർക്കാരുകൾ ഇടപെടാതായതോടെ വിപണിയിൽ പൂഴ്ത്തിവെപ്പും ദൃശ്യമായെന്നാണ് ആരോപണം. ഇതോടെ വില ' ബാണം ' പോലെ കുതിക്കുകയാണ്. വിപണിയിൽ വില കുത്തനെ ഉയർന്നതോടെ വിവാഹം പോലുള്ള ചടങ്ങുകളിൽ എണ്ണം കുറച്ച് ഭക്ഷണത്തിൽ പോലും നിയന്ത്രണം കൊണ്ടുവരികയാണ്.

ഇതോടെ സംസ്ഥാനത്ത് 10000ത്തിനടുത്ത് ആളുകൾ ജോലി ചെയ്യുന്ന പരമ്പരാഗത പാചക മേഖലയിൽ വലിയ തൊഴിൽ നഷ്ടമാണ് ഉണ്ടായിരിക്കുന്നത്. പാചകവാതകത്തിന്റെ വിലയും കുത്തനെ ഉയർന്നതോടെ കുടുംബ ബജറ്റ് താളം തെറ്റി. വിലക്കയറ്റം രൂക്ഷമായതോടെ ഉത്പന്നങ്ങളിൽ മായം ചേർക്കലും വ്യാപകമായതായി പരാതിയുണ്ട്. 

പാചകത്തിന് അത്യാവശ്യം വേണ്ട വെളുത്തുള്ളിക്ക് വില കിലോയ്ക്ക് 400 ആണ്. പരിപ്പിന് 130 രൂപയും ബിരിയാണി അരിക്ക് 110 ലെത്തി നിൽക്കുന്നു വില. ചോറ് വെക്കേണ്ട അരി വിലയും കുതിക്കുകയാണ്. 

പാചകത്തൊഴിൽ മേഖലയും സ്തംഭിച്ചു 

നിത്യോപയോഗ സാധനങ്ങളുടെ വിലക്കയറ്റത്തിൽ പാചക തൊഴിൽ മേഖലയും സ്തംഭിച്ചുവെന്ന് കേരള സ്റ്റേറ്റ് കുക്കിങ് വർക്കേർസ് യൂനിയൻ സംസ്ഥാന ജനറൽ സെക്രട്ടറി ഹനീഫ വി കണ്ണൂർ.  വിവാഹം പോലുള്ള വലിയ ചടങ്ങുകൾ വെട്ടിചുരുക്കി. ഭൂരിപക്ഷം തൊഴിലാളികൾക്കും തൊഴിൽ ദിനങ്ങൾ കുറഞ്ഞു. പാചക തൊഴിലാളികൾ ആത്മഹത്യാ വക്കിലാണ്.

വാടകയ്ക്കും മറ്റും താമസിക്കുന്നവരിൽ ഭൂരിപക്ഷവും വാടകപോലും കൊടുക്കാൻ കഴിയാതെ ഇറക്കിവിടൽ ഭീഷണിയിലാണ്. 
മത്സ്യവും മാംസവും പച്ചക്കറിയും പലവ്യഞ്ജനങ്ങളും എന്നുവേണ്ട സർവത്ര സാധനങ്ങൾക്കും ഭീമമായ വിലക്കയറ്റമാണ്. വിലക്കയറ്റം കാരണം തൊഴിൽ ലഭ്യത നഷ്ടപ്പെട്ടുകൊണ്ടിരിക്കുന്നതിനാൽ കേരള സ്റ്റേറ്റ് കുക്കിങ് വർക്കേഴ്‌സ് യൂനിയൻ പ്രക്ഷോഭ രംഗത്തേക്ക് ഇറങ്ങാൻ നിർബന്ധിതരായിരിക്കുകയാണെന്നും അദ്ദേഹം പറഞ്ഞു.