കൊല്‍ക്കത്ത: ഇന്ത്യക്ക് വേണ്ടി അണ്ടര്‍ 17 ലോകകപ്പ് ഫുട്‌ബോളില്‍ കളിച്ച ഇന്ത്യന്‍ താരം അനികേത് യാദവ് ഇംഗ്ലീഷ് ക്ലബായ ബ്ലാക്ക് ബേണ്‍ റോവേഴ്‌സിലേക്ക്. ട്രയല്‍സില്‍ പങ്കെടുക്കുന്നതിന് വേണ്ടിയാണ് താരം ഇംഗ്ലണ്ടിലേക്ക് പോകുന്നത്. മൂന്ന് മാസത്തെ ക്യാംപിന് ശേഷം താരത്തെ ഇഷ്ടപ്പെടുകയാണെങ്കില്‍ അനികേതിന് ക്ലബില്‍ തുടരാനാകും. ഇംഗ്ലണ്ടിലെ രണ്ടാം ഡിവിഷനില്‍ കളിക്കുന്ന ക്ലബാണ് ബ്ലാക്ക് ബേണ്‍ റോവേഴ്‌സ്. ഇതാദ്യമായാണ് ഇന്ത്യന്‍ താരം റോവേഴ്‌സിലെത്തുന്നത്. അനികേത് മികച്ച താരമാണെന്നും ഇന്ത്യന്‍ താരങ്ങള്‍ക്ക് അവസരം നല്‍കുന്നതില്‍ സന്തോഷമുണ്ടെന്നും ക്ലബുടമകള്‍ പ്രതികരിച്ചു. നിലവില്‍ ജംഷഡ്പുര്‍ എഫ്.സിക്ക് വേണ്ടി കളിക്കുന്ന താരം രണ്ട് വര്‍ഷം മുമ്പാണ് ഐ.എസ്.എല്‍ ക്ലബില്‍ ചേര്‍ന്നത്. ലോകകപ്പ് എനിക്ക് മികച്ച അനുഭവങ്ങള്‍ തന്നു. അവിടെ നിന്ന് കൂടുതല്‍ ഉയരത്തിലേക്ക് പറക്കാനായിരുന്നു ഞാന്‍ ശ്രമിച്ചത്. അതിന്റെ തുടക്കം ഇതാവട്ടെ എന്ന് പ്രാര്‍ഥിക്കുന്നു -അനികേത് പറഞ്ഞു. ഇന്ത്യന്‍ വംശജനായ ബാലാജി റാവുവിന്റെ ഉടമസ്ഥതയിലുള്ളതാണ് റോവേഴ്‌സ് ക്ലബ്. ഇന്ത്യന്‍ താരത്തെ മികച്ച രീതിയില്‍ സഹായിക്കാന്‍ ക്ലബിനാകുമെന്ന് ബാലാജി റാവു പറഞ്ഞു.

അതിനാല്‍ അനികേതിന് ഇവിടെ നിന്ന് മികച്ച രീതിയിലുള്ള പരിശീലനം ലഭിക്കുമെന്നും റാവു പറഞ്ഞു.