ജിദ്ദ: കൊവിഡിനെ തുടര്‍ന്ന് ജോലി നഷ്ടമായി ഏറ്റവും കൂടുതല്‍ മലയാളികള്‍ മടങ്ങുന്നത് യു.എ.ഇയില്‍ നിന്ന്. രണ്ടാം സ്ഥാനത്ത് സഊദിയാണ്. തൊട്ടടുത്ത് ഖത്തറുണ്ട്. ഇവരുടെ പുനരധിവാസമായിരിക്കും സംസ്ഥാനം നേരിടുന്ന ഏറ്റവും വലിയ വെല്ലുവിളി. ഇക്കാര്യത്തില്‍ ഉടന്‍ മാസ്റ്റര്‍പ്ലാന്‍ തയാറാക്കണമെന്നാണ് വിദഗ്ധരുടെ നിര്‍ദേശം.
നിലവില്‍ സംസ്ഥാനത്തേക്ക് മടങ്ങുന്നതിനായി 4,42,238 പ്രവാസികളാണ് നോര്‍ക്കയില്‍ രജിസ്റ്റര്‍ ചെയ്തിരിക്കുന്നത്. ഇതില്‍ 1,96,039 പേര്‍ യു.എ.ഇയില്‍ നിന്നാണ്. ഇതില്‍ 61,009 പേരാണ് ജോലി നഷ്ടപ്പെട്ട് കേരളത്തിലേക്ക് മടങ്ങുന്നത്. സഊദിയില്‍ നിന്ന് രജിസ്റ്റര്‍ ചെയ്തവരില്‍ 10,000 പേര്‍ തൊഴില്‍ നഷ്ടപ്പെട്ടവരാണ്. ഖത്തറില്‍ നിന്ന് 8,000 പേരും.
കുവൈത്തില്‍ പൊതുമാപ്പ് പ്രയോജനപ്പെടുത്തി മലയാളികളടക്കം 6,000 ഇന്ത്യക്കാരെ നാടുകടത്തല്‍ കേന്ദ്രത്തിലേക്ക് മാറ്റിയിട്ടുള്ളത്. ഇവരെ കുവൈത്ത് എയര്‍വെയ്‌സിന്റെ വിമാനങ്ങളില്‍ ഇന്ത്യയിലെത്തിക്കാനുള്ള ശ്രമം കൊറോണ വ്യാപനത്തെ തുടര്‍ന്ന് അവസാന നിമിഷം പരാജയപ്പെടുകയായിരുന്നു. ഇന്ത്യന്‍ സര്‍ക്കാരിന്റെ അനുമതി ലഭിക്കാത്തതിനെ തുടര്‍ന്നാണ് ഈ നീക്കം ഉപേക്ഷിച്ചത്.
ഈജിപ്ത്, ഫിലിപ്പൈന്‍സ് എന്നീ രാജ്യങ്ങളില്‍ നിന്നുള്ളവരെ കുവൈത്ത് എയര്‍വെയ്‌സ് വിമാനത്തില്‍ അതാത് രാജ്യത്ത് എത്തിച്ചിട്ടുണ്ട്.
ജോലി നഷ്ടപ്പെട്ടര്‍, ജയില്‍മോചിതരായവര്‍, വിസാ കാലാവധി കഴിഞ്ഞതിനാല്‍ മടങ്ങിപ്പോകാന്‍ കഴിയാത്തവര്‍ എന്നിവര്‍ക്കായിരിക്കും പുനരധിവാസപദ്ധതി നടപ്പാക്കേണ്ടിവരിക. അതേസമയം, കൊവിഡിനെ തുടര്‍ന്ന് ഗള്‍ഫ് രാജ്യങ്ങളിലെ പല കമ്പനികളും അടച്ചുപൂട്ടലിന്റെ വക്കിലാണ്. ജീവനക്കാരെ കുറച്ച് പിടിച്ചുനില്‍ക്കാന്‍ ശ്രമിക്കുന്ന കമ്പനികളുമുണ്ട്.
ഈ സാഹചര്യത്തില്‍ ഒട്ടേറെ ഇന്ത്യക്കാര്‍ക്ക് ഇനിയും ജോലി നഷ്ടമാകും. നിലവിലെ പ്രതിസന്ധി മറികടക്കാന്‍ കുറഞ്ഞത് ആറുമാസമെങ്കിലും സമയമെടുക്കുമെന്നാണ് വിദഗ്ധര്‍ അഭിപ്രായപ്പെടുന്നത്. കൊറോണ പ്രതിസന്ധിയുടെ പശ്ചാത്തലത്തില്‍ ഗള്‍ഫ് നാടുകളുടെ ജി.ഡി.പി 0.6 ശതമാനത്തിലേക്ക് താഴുമെന്നാണ് പഠനങ്ങള്‍ വ്യക്തമാക്കുന്നത്.