ന്യൂഡല്‍ഹി: വ്യോമാക്രമണത്തില്‍ ബലാകോട്ടിലെ  കെട്ടിടങ്ങള്‍ക്ക് യാതൊരു തകരാറും സംഭവിച്ചിട്ടില്ലെന്ന് തെളിയിക്കുന്ന സാറ്റലൈറ്റ് ചിത്രങ്ങള്‍ പുറത്ത്. ബലാകോട്ടിലെ ജയ്‌ഷെ മുഹമ്മദിന്റെ പരിശീലനങ്ങള്‍ തകര്‍ത്തെന്ന കേന്ദ്ര സര്‍ക്കാറിന്റെ വാദത്തിന് വിരുദ്ധമായ ചിത്രം റോയിട്ടേഴ്‌സ് ആണ് പുറത്തു വിട്ടത്. ആക്രമണത്തില്‍ പരിശീലന കേന്ദ്രങ്ങള്‍ തകര്‍ന്നെന്നും 250ലേറെ ഭീകരര്‍ കൊല്ലപ്പെട്ടുമെന്നുമായിരുന്നു കേന്ദ്രത്തിന്റെ വാദം.

മാര്‍ച്ച് നാലിന് സാന്‍ഫ്രാന്‍സിസ്‌കോ കേന്ദ്രീകരിച്ചുള്ള സ്വകാര്യ സാറ്റലൈറ്റ് ഓപറേറ്ററായ പ്ലാനെറ്റ് ലാബിന്റെതാണ് ചിത്രങ്ങള്‍. വ്യോമാക്രമണം നടന്ന് ആറ് ദിവസത്തിന് ശേഷമുള്ള ചിത്രമാണിത്. ചിത്രത്തില്‍ കെട്ടിടങ്ങള്‍ വ്യക്തമായി കാണുന്നുണ്ട്.

ബലാകോട്ട് ആക്രമണത്തിന്റെ പൂര്‍ണ വിവരങ്ങള്‍ ആവശ്യപ്പെട്ട പ്രതിപക്ഷ സമ്മര്‍ദ്ദം ശക്തമാകുന്നതിനിടെയാണ് റിപ്പോര്‍ട്ട് പുറത്തു വന്നിരിക്കുന്നത്.