ഗുവാഹത്തി: ഐ.എസ്.എല്‍ അഞ്ചാം സീസണിന്റെ സെമി ഫൈനല്‍ മത്സരങ്ങള്‍ക്ക് ഇന്ന് തുടക്കമാകും.ആദ്യ സെമിയില്‍ കരുത്തരായ ബംഗളൂരു എഫ്.സിയും നോര്‍ത്ത് ഈസ്റ്റ് യുനൈറ്റഡും തമ്മിലാണ് കൊമ്പുകോര്‍ക്കുന്നത്.
മത്സരത്തിലുടനീളം മികച്ച പ്രകടനം നടത്തിയിരുന്ന ബംഗളൂരു എഫ്. സി അടുത്തിടെയായി മോശം ഫോമിലാണ്. ബംഗളൂരു അവസാനമായി മത്സരിച്ച അഞ്ചെണ്ണത്തില്‍ നാലിലും തോല്‍വിയായിരുന്നു. പട്ടികയില്‍ ഏറ്റവും പിറകിലുണ്ടായിരുന്ന ഡല്‍ഹി ഡൈനാമോസിനോട് പോലും വലിയ തോല്‍വി വഴങ്ങി. നിലവിലെ സാഹചര്യത്തില്‍ നോര്‍ത്ത് ഈസ്റ്റിനെ പരാജയപ്പെടുത്തണമെങ്കില്‍ ബംഗളൂരുവിന് ഇന്ന് അല്‍പം വിയര്‍ക്കേണ്ടി വരും. മികച്ച ഫോമില്‍ കളിക്കുന്ന ഓഗ്ബച്ചെ, റൗളിന്‍ ബോര്‍ജസ് എന്നിവരെ പിടിച്ചുകെട്ടിയാല്‍ മാത്രമേ ബംഗളൂരുവിന് കിരീടത്തിലേക്ക് പ്രതീക്ഷ വെക്കേണ്ടതുള്ളൂ. അതേ സമയം നാലാം സ്ഥാനക്കാരായി പ്ലേ ഓഫിലേക്ക് യോഗ്യത നേടിയ നോര്‍ത്ത് ഈസ്റ്റ് യുനൈറ്റഡ് മികച്ച ഫോമിലാണ്. അവസാനമായി നോര്‍ത്ത് ഈസ്റ്റ് കളിച്ച നാല് മത്സരങ്ങളിലും ടീം തോല്‍വി അറിഞ്ഞിട്ടില്ല. ഗ്രൂപ്പ് ഘട്ടത്തില്‍ ഇരു ടീമുകളും തമ്മില്‍ ഏറ്റുമുട്ടിയപ്പോല്‍ ഒരു മത്സരത്തില്‍ ബംഗളൂരു വെന്നിക്കൊടി പാറിച്ചപ്പോള്‍ മറ്റൊരു മത്സരത്തില്‍ നോര്‍ത്ത് ഈസ്റ്റ് ബംഗളൂരുവിനെ സമനിലയില്‍ തളക്കുകയായിരുന്നു. നിലവിലെ ഫോമില്‍ നോര്‍ത്ത് ഈസ്റ്റിന് ബംഗാളൂരുവിനെക്കാളും മാനസിക മുന്‍തൂക്കമുണ്ട്. ഈ മാനസിക മുന്‍തൂക്കം മുതലെടുത്ത് ബംഗളൂരുവിനെ പരാജയപ്പെടുത്താനുള്ള ഒരുക്കത്തിലാണ് നോര്‍ത്ത് ഈസ്റ്റ് യുനൈറ്റഡ്.
ഐ.എസ്.എല്‍ ചരിത്രത്തില്‍ ആദ്യമായിട്ടാണ് നോര്‍ത്ത് ഈസ്റ്റ് യുനൈറ്റഡ് പ്ലേ ഓഫിലെത്തുന്നത്. ഇത് ചരിത്രമാക്കാനുള്ള ഒരുക്കത്തിലാണ് ടീം. അതേ സമയം കിരീടം നിലനിര്‍ത്താനുള്ള തന്ത്രപ്പാടില്‍ ബംഗളൂരുവും ഇറങ്ങുമ്പോള്‍ ഇന്നത്തെ മത്സരത്തില്‍ തീ പാറുമെന്നുറപ്പാണ്.