നെടുമ്പാശേരി: ദുബൈയില്‍നിന്നുള്ള 178 മലയാളികള്‍ കൂടി നെടുമ്പാശേരിയിലെത്തി. എയര്‍ ഇന്ത്യ എക്‌സ്പ്രസിന്റെ ഐ.എക്‌സ് 434 നമ്പര്‍ വിമാനം ഇന്നലെ രാത്രി 8.06 നാണ് നെടുമ്പാശേരിയില്‍ എത്തിയത്. 86 പുരുഷന്മാരും 86 സ്ത്രീകളും പത്ത് വയസില്‍ താഴെ പ്രായമായ അഞ്ച് കുട്ടികളും ഒരു കൈക്കുഞ്ഞുമാണ് ഈ വിമാനത്തില്‍ ജന്മ നാട്ടില്‍ മടങ്ങിയെത്തിയത്.
മലയാളികളെ കൊണ്ടുവരുന്നതിനായി ഇന്നലെ രാവിലെ 11 മണിക്കാണ് എയര്‍ ഇന്ത്യ എക്‌സ്പ്രസ് വിമാനം നെടുമ്പാശേരിയില്‍നിന്നു യാത്രയായത്. പ്രവാസികളുമായി രണ്ട് വിമാനങ്ങള്‍ കൂടി ഇന്ന് നെടുമ്പാശേരിയിലെത്തും. ദമാമില്‍നിന്നുള്ള വിമാനം രാത്രി 8.30 നും സിംഗപ്പൂരില്‍നിന്നുള്ള വിമാനം രാത്രി 10.50 നുമാണ് എത്തുന്നത്.