ആലപ്പുഴ: ബൈപാസ് നിര്‍മാണം തടസപ്പെടുത്തിയ ഡി.വൈ.എഫ്.ഐയുടെ നടപടി പ്രതിഷേധാര്‍ഹമാണെന്ന് കെ.സി വേണുഗോപാല്‍ എം.പി പറഞ്ഞു.
നിര്‍മാണ പ്രവര്‍ത്തനങ്ങള്‍ക്കിടയില്‍ വൈദ്യുത ലൈന്‍ വിച്ഛേദിക്കപ്പെട്ടുവെന്ന നിസാര കാരണത്തിന്റെ പേരിലാണ് നിര്‍മാണ സാമഗ്രികളിലും വാഹനങ്ങളിലും കൊടികുത്തുകയും പണികള്‍ സ്തംഭിപ്പിക്കുകയുമുണ്ടായത്. വൈദ്യുത ലൈന്‍ പുനസ്ഥാപിക്കുന്നത് സംബന്ധിച്ച നടപടികള്‍ പൂര്‍ത്തിയാക്കാമെന്ന് ബന്ധപ്പെട്ടവര്‍ അറിയിച്ചിട്ടും പണി തുടരാന്‍ അനുവദിക്കില്ലെന്ന നിലപാട് അനുവദിക്കാനാവില്ല.
30 വര്‍ഷമായി മുടങ്ങിക്കിടന്ന പദ്ധതി ഒട്ടെറെ കഠിന പരിശ്രമങ്ങള്‍ക്കൊടുവിലാണ് ആരംഭിക്കാനായത്.
നിര്‍മാണം ആരംഭിച്ചശേഷവും പലവിധ തടസങ്ങള്‍ പദ്ധതി നേരിടുന്നുണ്ടെന്നും എന്നാല്‍ നിസാരമായി പരിഹരിക്കാവുന്ന ഒരു പ്രശ്‌നത്തിന്റെ മറവില്‍ നിര്‍മാണ പ്രവര്‍ത്തനങ്ങളെല്ലാം സ്തംഭിപ്പിച്ചത് നീതീകരിക്കാനാവില്ല.
പണി തടസപ്പെടുത്തിയ നടപടി സി.പി.എം നേതൃത്വത്തിന്റെയും സര്‍ക്കാരിന്റെയും അറിവോടെയാണോ എന്ന് വ്യകതമാക്കണമെന്നും എം.പി ആവശ്യപ്പെട്ടു.