കൊച്ചി: സമൂഹമാധ്യമങ്ങളിലൂടെയുള്ള വാക്പോര് തടയാന്‍ നിയമം കൊണ്ടുവരണമെന്ന് ഹൈക്കോടതി. സമൂഹമാധ്യമങ്ങളിലൂടെയുള്ള പോര് നിയമവാഴ്ചയെ തകിടംമറിക്കുമെന്ന് ജസ്റ്റിസ് പി.വി.കുഞ്ഞികൃഷ്ണന്‍ നിരീക്ഷിച്ചു. സമൂഹമാധ്യമം വഴി അസഭ്യപ്രയോഗം നടത്തിയ ശ്രീജ പ്രസാദിന്റെ ജാമ്യാപേക്ഷ പരിഗണിക്കവെയാണ് ഹൈക്കോടതിയുടെ പരാമര്‍ശം.

അപകീര്‍ത്തികരമായ പോസ്റ്റിനെതിരെ സമൂഹം അതേരീതിയില്‍ പ്രതികരിക്കുന്നുവെന്നും അദ്ദേഹം നിരീക്ഷിച്ചു. ഇവിടെ നിയമവാഴ്ച പരാജയപ്പെടുന്നു. നിയമം അംഗീകരിക്കാത്ത ഒരു സമാന്തര സമൂഹം ഉദയം ചെയ്യുന്നു. ഇത് അത്യന്തം ഗൗരവമേറിയ സാഹചര്യമാണെന്ന് കോടതി ചൂണ്ടിക്കാട്ടി.

നാട്ടില്‍ ക്രമസമാധാനവും നിയമവാഴ്ചയും ഉറപ്പിക്കേണ്ടത് സര്‍ക്കാരിന്റെ ബാധ്യതയാണ്. സമൂഹമാധ്യമങ്ങളില്‍ സഭ്യത ലംഘിച്ച് പോരടിക്കുന്നവരെ പിടികൂടാന്‍ പൊലിസ് കൂടുതല്‍ ജാഗ്രത കാണിക്കണമെന്നും കോടതി നിര്‍ദ്ദേശിച്ചു.