തൊഴിയൂര്‍: സുന്നി യുവജന സംഘം ജില്ലാ കമ്മിറ്റിയുടെ ആഭിമുഖ്യത്തില്‍ ഏപ്രില്‍ ഒന്നിന് വിപുലമായ നേതൃ സംഗമം പുതിയകാവ് ഇല്‍ഫത്ത് ഓഡിറ്റോറിയത്തില്‍ നടക്കും. അദാലത്ത് മുഖേന രജിസ്‌ട്രേഷന്‍ പൂര്‍ത്തിയാക്കിയ ശാഖാ മേഖല മണ്ഡലം കമ്മിറ്റികളില്‍ നിന്നുള്ള ഔദ്യോഗിക ഭാരവാഹികളും ജില്ലാ കൗണ്‍സിലര്‍മാരുമാണ് മീറ്റില്‍ പങ്കെടുക്കുക.
രാവിലെ 9.30 മുതല്‍ മൂന്ന് മണി വരെ നീണ്ടു നില്‍ക്കുന്ന സംഗമത്തില്‍ ആദര്‍ശം, സംഘാടനം, പ്രചാരണം, സമാപനം എന്നീ സെഷനുകളിലായി അബ്ദുസമദ് പൂക്കോട്ടൂര്‍, തോട്ടുമുക്കം ഇസ്മായില്‍ സഖാഫി, എം.കെ ആതവനാട്, ഇബ്രാഹിം പഴയന്നൂര്‍ എന്നിവര്‍ വിവിധ വിഷയങ്ങള്‍ അവതരിപ്പിക്കും.
വിവിധ കാരണങ്ങളാല്‍ മാറ്റിവച്ച ലീഡേഴ്‌സ് മീറ്റ് ഏപ്രില്‍ ഒന്നിന് നടത്താന്‍ തൊഴിയൂര്‍ ദാറുറഹ്മ യത്തീംഖാനയില്‍ ചേര്‍ന്ന ജില്ലാ സെക്രട്ടേറിയറ്റ് യോഗമാണ് തീരുമാനിച്ചത്. ജില്ലാ പ്രസിഡന്റ് അബ്ദുല്‍ കരീം ഫൈസി പൈങ്കണ്ണിയൂര്‍ അധ്യക്ഷനായിരുന്നു.ജനറല്‍ സെക്രട്ടറി ശറഫുദ്ദീന്‍ മൗലവി വെന്മേനാട് ട്രഷറര്‍ സി.കെ അഷ്‌റഫലി വര്‍ക്കിങ് സെക്രട്ടറി പി.പി മുസ്ഥഫ മുസ്‌ലിയാര്‍ അബ്ദുല്‍ ഗഫൂര്‍ അല്‍ ഖാസിമി അകലാട് സമസ്ത കേരള ജംഇയ്യത്തുല്‍ മുഅല്ലിമീന്‍ ജില്ലാ ജനറല്‍ സെക്രട്ടറി വി.എം ഇല്‍യാസ് ഫൈസി ഉമര്‍ ഹാജി എടയാടി മൊയ്തുണ്ണി ഹാജി തൈക്കാട് സംസാരിച്ചു.
മണ്ഡലം കമ്മിറ്റികള്‍ മുഖേന മുന്‍കൂട്ടി വിതരണം ചെയ്തിട്ടുള്ള ബയോഡാറ്റകള്‍ നിശ്ചിത അംഗങ്ങള്‍ പൂരിപ്പിച്ച് മാര്‍ച്ച് 10ന് മുന്‍പായി ജില്ലാ കമ്മിറ്റിയെ ഏല്‍പ്പിക്കണമെന്ന് ജില്ലാ വര്‍ക്കിങ് സെക്രട്ടറി പി.പി മുസ്ഥഫ മുസ്‌ലിയാര്‍ അറിയിച്ചു.