ദോഹ: ഇന്ത്യയില്‍ പുതിയ വിമാനക്കമ്പനി തുടങ്ങുന്നതുമായി ബന്ധപ്പെട്ട നടപടിക്രമങ്ങള്‍ ഉടന്‍ പൂര്‍ത്തിയാക്കുമെന്ന് ഖത്തര്‍ എയര്‍വെയ്‌സ് ഗ്രൂപ്പ് ചീഫ് എക്‌സിക്യൂട്ടീവ് അക്ബര്‍ അല്‍ബാക്കിര്‍ അറിയിച്ചു. ദോഹയില്‍ നടക്കുന്ന 12-ാമത് എഷ്യാ പസഫിക് മേഖലാ അസംബ്ലിക്കിടയില്‍ വാര്‍ത്താലേഖകരോട് സംസാരിക്കുകയായിരുന്നു അദ്ദേഹം.

ചില ആഭ്യന്തര നടപടിക്രമങ്ങള്‍ പൂര്‍ത്തിയാക്കാനുണ്ട്. ബോര്‍ഡില്‍ നിന്നും ചെയര്‍മാനില്‍ നിന്നുമുള്ള അനുമതിക്കായി കാത്തിരിക്കുകയാണ്. കിട്ടിയാലുടന്‍ ഇന്ത്യന്‍ അധികൃതര്‍ക്ക് അപേക്ഷ നല്‍കും. എല്ലാ നടപടികളും ഉടന്‍ പൂര്‍ത്തിയാവുമെന്നാണ് പ്രതീക്ഷിക്കുന്നതെന്നും അല്‍ബാക്കിര്‍ പറഞ്ഞു.

ഇന്ത്യയില്‍ ആഭ്യന്തര സര്‍വീസ് തുടങ്ങുന്നതിനു മുന്നോടിയായി 100 പുതിയ വിമാനങ്ങള്‍ വാങ്ങാനുള്ള തയ്യാറെടുപ്പിലാണ് ഖത്തര്‍ എയര്‍വെയ്‌സ്. കാര്‍ഗോ സംവിധാനം നിലവിലുള്ളതിന്റെ ഇരട്ടിയാക്കാനുള്ള പ്രവര്‍ത്തനങ്ങളും നടന്നുകൊണ്ടിരിക്കുന്നു. ലോകത്തിലെ മൂന്നാമത്തെ ഏറ്റവും വലിയ കാര്‍ഗോ കമ്പനിയാണ് ഖത്തര്‍ എയര്‍വെയ്‌സ്.