കൊച്ചി: കുട്ടികളോട് ലൈംഗിക അതിക്രമം കാട്ടിയ കരാട്ടെ അധ്യാപകന്‍ പൊലിസ് പിടിയില്‍. വടുതലയിലുള്ള ഫ്‌ളാറ്റിലെ പെണ്‍കുട്ടികള്‍ക്ക് കരാട്ടെ ക്ലാസ് എടുക്കുവാന്‍ വന്ന വൈപ്പിന്‍ സ്വദേശി ജിബിന്‍ (39) ആണ് അറസ്റ്റിലായത്. കഴിഞ്ഞ മാസം 28ാം തിയതിയാണ് ജിബിന്‍ ഫ്‌ളാറ്റില്‍ ക്ലാസ് എടുക്കാന്‍ എത്തിയത്.
ആഴ്ചയില്‍ മൂന്ന് ക്ലാസുകളാണ് ഉണ്ടായിരുന്നത്. തുടക്കത്തില്‍ കൂടുതല്‍ കുട്ടികള്‍ ഉണ്ടായിരുന്നെങ്കിലും പിന്നീട് പലരും പങ്കെടുക്കാതായി. തുടര്‍ന്ന് മാതാപിതാക്കള്‍ ഇതേക്കുറിച്ച് ചോദിച്ചപ്പോഴാണ് അധ്യാപകന്‍ മോശമായി പെരുമാറുന്ന വിവരം കുട്ടികള്‍ മതാപിതാക്കളെ അറിയിക്കുന്നത്.

തുടര്‍ന്ന് രക്ഷിതാക്കള്‍ നോര്‍ത്ത് പൊലിസില്‍ പരാതി നല്‍കുകയായിരുന്നു. പത്തിനും പതിനാലിനും ഇടയില്‍ പ്രായമായ കുട്ടികളോടാണ് പ്രതി ലൈംഗിക അതിക്രമം കാട്ടിയത്. പൊലിസ് പിടിയിലായ ജിബിന്‍ കുറ്റം സമ്മതിച്ചു. പ്രതി കുട്ടികളെ ലൈംഗികമായി ഉപദ്രവിക്കുന്നതിന്റെ സി.സി.ടി.വി ദൃശ്യങ്ങള്‍ പൊലിസിനു ലഭിച്ചിട്ടുണ്ട്.

2013 ല്‍ പള്ളുരുത്തിയിലുള്ള ഒരു സ്‌കൂളിലെ കുട്ടികളോട് ഇത്തരത്തില്‍ ലൈംഗിക അതിക്രമം കാണിച്ചതിന് പ്രതിക്കെതിരേ കേസ് നിലവിലുണ്ട്. പോക്‌സോ പ്രകാരമാണ് കേസെടുത്തിരിക്കുന്നത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.