മലപ്പുറം: യുവാക്കള്‍ക്കും വിദ്യാര്‍ഥികള്‍ക്കും കഞ്ചാവ് വില്‍പന നടത്തുന്നയാള്‍ പിടിയില്‍. അരിമ്പ്ര തോട്ടശ്ശേരി ഉമ്മര്‍ അലി (37) യാണ് വില്‍പനയ്ക്കായി കൊണ്ടുപോകുമ്പോള്‍ കാല്‍ കിലോ കഞ്ചാവുമായി മലപ്പുറം എക്‌സൈസ് റെയ്ഞ്ച് പാര്‍ട്ടി പിടികൂടിയത്. പൂക്കോട്ടൂര്‍, അറവങ്കര, അരിമ്പ്ര, മൈലാടി ഭാഗങ്ങളില്‍ യുവാക്കള്‍ക്കും കുട്ടികള്‍ക്കും കഞ്ചാവ് വില്‍ക്കുന്നത് ഇയാളാണെന്ന് എക്‌സൈസ് സംഘം പറയുന്നു.
കഴിഞ്ഞ ഒരു മാസത്തിനുള്ളില്‍ അരിമ്പ്ര, മിനി ഊട്ടി ഭാഗങ്ങളില്‍നിന്ന് എക്‌സൈസ് പിടികൂടുന്ന നാലാമത്തെ കേസാണിത്.
കഴിഞ്ഞ ഒരു വര്‍ഷം മുന്‍പു ഗള്‍ഫില്‍നിന്നു നാട്ടിലെത്തിയ പ്രതി കഞ്ചാവ് വില്‍പന തുടങ്ങുകയായിരുന്നു. പ്രതിയുടെ ഫോണിലേക്കു യുവാക്കള്‍ ഉള്‍പ്പെടെ നിരവധി പേര്‍ കഞ്ചാവിനായി വിളിക്കുന്നുണ്ടായിരുന്നെന്ന് എക്‌സൈസ് ഉദ്യോഗസ്തര്‍ പറഞ്ഞു. എക്‌സൈസ് ഇന്‍സ്‌പെക്ടര്‍ ടി.എന്‍ സുധീര്‍, അസി. എക്‌സൈസ് ഇന്‍സ്‌പെക്ടര്‍ വി. രാധാകൃഷ്ണന്‍, സിവില്‍ എക്‌സൈസ് ഓഫിസര്‍മാരായ മുഹമ്മദലി, രഞ്ജിത്ത്, അനീഷ് എന്നിവര്‍ പങ്കെടുത്തു.