തിരുവനന്തപുരം: കഴിഞ്ഞ അഞ്ചുവര്‍ഷത്തിനിടയില്‍ സംസ്ഥാന മോട്ടോര്‍വാഹന വകുപ്പിന്റെ വരുമാനത്തിലുണ്ടായത് 1820 കോടി രൂപയുടെ വര്‍ധനവെന്ന് കണക്കുകള്‍.

2012-13 വര്‍ഷത്തില്‍ 1831.15 കോടി രൂപയായിരുന്ന വരുമാനം 2017-18ല്‍ 3651.80 കോടി രൂപയായി വര്‍ധിച്ചു. സംസ്ഥാനത്തെ നിരത്തുകളിലേക്ക് ഇറങ്ങുന്ന വാഹനങ്ങളുടെ എണ്ണത്തിലും വര്‍ധനവ് ഉണ്ടായിട്ടുണ്ട്. അഞ്ചുവര്‍ഷത്തിനിടെ മോട്ടോര്‍വാഹനങ്ങളുടെ എണ്ണത്തില്‍ 40 ലക്ഷത്തിന്റെ വര്‍ധനവാണ് ഉണ്ടായത്.2012-13 കാലഘട്ടത്തില്‍ സംസ്ഥാനത്തെ മോട്ടോര്‍ വാഹനങ്ങളുടെ ആകെ എണ്ണം 80,42,541 ആയിരുന്നു. 2017-18 ല്‍ ഇത് 12,042,691 ആയി വര്‍ധിച്ചു.

പ്രതിവര്‍ഷം പത്ത് ശതമാനത്തിലധികം വളര്‍ച്ചയാണ് മോട്ടോര്‍ വാഹനങ്ങളുടെ എണ്ണത്തില്‍ ഉണ്ടായത്.ജില്ല തിരിച്ചുള്ള കണക്കെടുത്താല്‍ സംസ്ഥാനത്ത് ഏറ്റവും കൂടുതല്‍ വാഹനങ്ങള്‍ ഉള്ളത് എറണാകുളം ജില്ലയിലാണ്. ഇവിടെ 17,96,868 വാഹനങ്ങളാണ് ഉള്ളത്.

സംസ്ഥാനത്തെ മൊത്തം വാഹനങ്ങളുടെ 14.9 ശതമാനമാണിത്. രണ്ടാമത് തിരുവനന്തപുരം ജില്ലയിലാണ്. ഇവിടെ 15,23,414 വാഹനങ്ങളാണ് ഉള്ളത് (12.7 ശതമാനം). ഏറ്റവും കുറവ് വാഹനങ്ങള്‍ വയനാട് ജില്ലയിലാണ് 1,76,093 എണ്ണം.വാഹനങ്ങളില്‍ ഏറ്റവും കൂടുതല്‍ വര്‍ധനവുണ്ടായത് ഇരുചക്ര വാഹനങ്ങളുടെ എണ്ണത്തിലാണ്.

2012-13 ല്‍ 50,41,495 ലക്ഷമായിരുന്ന ഇരുചക്ര വാഹനങ്ങള്‍ 2017-18ല്‍ എത്തുമ്പോഴേക്ക് 77,96,669 ആയി വര്‍ധിച്ചിട്ടുണ്ട്. 27 ലക്ഷത്തിലധികമാണ് വര്‍ധനവ്. കാറുകളുടെ എണ്ണം അഞ്ചുവര്‍ഷത്തിനിടെ 11,42,266 ആയി വര്‍ധിച്ചു. അതേസമയം ടാക്‌സി കാറുകളുടെ എണ്ണം കുറയുകയാണ് ചെയ്തത്. 2012-13ല്‍ 1,28,250 ആയിരുന്ന ടാക്‌സി കാറുകളുടെ എണ്ണം 2017-18ല്‍ 1,27,011 ആയി കുറഞ്ഞു. സാമ്പത്തിക അവലോകന റിപ്പോര്‍ട്ട് അനുസരിച്ച് 1,000 ആളുകള്‍ക്ക് 361 വാഹനങ്ങള്‍ എന്നതാണ് സംസ്ഥാനത്തെ അനുപാതം.