റിയാദ്: സഊദിയിൽ കൊവിഡ്​ 19 ബാധിച്ച് ഒരു മലയാളി കൂടി മരണപ്പെട്ടു.​ റിയാദിലെ ആശുപത്രിയിൽ ചികിത്സയിലായിരുന്ന കൊല്ലം അഞ്ചൽ ഇടമുളക്കൽ ആതിര ഭവനിൽ മധുസൂദനൻ പിള്ള (61) ആണ്​ മരിച്ചത്​. പനിയെ തുടർന്ന്​ ആശുപത്രിയിൽ ​പ്രവേശിപ്പിച്ച ഇദ്ദേഹത്തിന്​ രണ്ടാഴ്ച്ച മുമ്പാണ് കൊവിഡ് ബാധ സ്ഥിരീകരിച്ചത്. ആദ്യ ഘട്ടം പിന്നിട്ടതിനെ തുടർന്ന് തുടർന്ന് സുവൈദിയിലെ അൽഹമ്മാദി ആശുപത്രിയിൽ തീവ്രപരിചരണ വിഭാഗത്തിലും പിന്നീട് വെന്റിലേറ്ററിലുമായിരുന്നു. ശനിയാഴ്ച്ച രാത്രി എട്ടിനാണ്​ മരണം സംഭവിച്ചത്​. അഞ്ച്​ വർഷമായി സഊദിയിൽ സി.സി.സി എന്ന കമ്പനിയിൽ ഡ്രൈവിങ്​ ട്രെയിനറായി ജോലി ചെയ്യുകയായിരുന്നു. നേരത്തെ, ദുബൈയിലും കുവൈത്തിലുമായി 25 വർഷം ജോലി ചെയ്‌തിട്ടുണ്ട്‌. ഭാര്യ: രമ മണി. മകൾ: ആതിര. മരുമകൻ: വിഷ്‌ണു. മാതാവ്: പത്മാക്ഷിയമ്മ. സഹോദരങ്ങൾ: പ്രഭാകുമാർ, വരദരാജൻ, പത്മരാജൻ പിള്ള, ജലജ കുമാരി. ഇതോടെ സഊദിയിൽ കൊവിഡ്​ ബാധിച്ച്​ മരിച്ച മലയാളികളുടെ എണ്ണം 13 ആയി.